O Ateneo de Santiago deu a coñecer este martes o programa do Seminario Europa para o curso 2025-2026, nun acto celebrado na sede da entidade no que interviñeron o presidente, Francisco Candela, e a directora do ciclo, Cristina Ares Castro-Conde, profesora da Universidade de Santiago de Compostela.
A primeira sesión terá lugar este mércores 29 de outubro, a partir das 19:30, e estará protagonizada polo eurodeputado Nicolás González Casares (PSdeG), quen ofrecerá a conferencia titulada «A UE ante os novos deuses fortes».
O programa desenvolverase ata o mes de maio con oito sesións que contarán coa presenza dos catro eurodeputados galegos con representación en Bruxelas —Adrián Vázquez Lázara (PP), Ana Miranda Paz (BNG), Francisco Millán Mon (PP) e Nicolás González Casares (PSOE)—, así como con profesorado e especialistas en política europea. Os debates abordarán cuestións de actualidade como as relacións con China, a igualdade de xénero, ou os desafíos da política de cohesión e da seguridade na UE.
Durante a presentación, Francisco Candela destacou que o obxectivo do seminario é “achegar Europa aos cidadáns, para que coñezan a problemática existente, as liñas de traballo que se están a desenvolver e o peso que teñen as decisións europeas na súa vida cotiá”.
Pola súa parte, Cristina Ares lembrou que “en xaneiro cúmprense 40 anos da adhesión de España á Comunidade Europea”, e subliñou que o programa “reivindica unha Europa máis unida, democrática e solidaria, con proximidade á cidadanía”. Engadiu tamén que o seminario mantén o seu carácter de “espazo de debate rigoroso e plural, aberto a persoas de todas as idades e ámbitos sociais”.
