O Goberno local de Santiago sostén que o parque de bombeiros “non está pechado”, malia a denuncia feita polo colectivo durante a fin de semana, e asegura que a situación responde á coincidencia de baixas e á falta de persoal acumulada durante anos. Así o explicou este luns a portavoz municipal, Míriam Louzao, tras a reunión da Xunta de Goberno Local, na que aproveitou para detallar o estado do servizo e as medidas que o Concello está a aplicar para reforzalo.
Louzao aclarou que o mínimo operativo no parque é de nove efectivos por quenda, o que permite dispoñer de dúas dotacións de catro persoas e unha persoa na central. Non obstante, nesta xornada só había dispoñible un equipo de catro, debido a unha baixa de última hora. A portavoz indicou que o cadro ideal para garantir o servizo con marxe sería de 65 efectivos, mentres que actualmente o parque conta con 56 postos operativos, fronte aos 53 que existían cando o actual goberno tomou posesión. “Chegou a haber 75 postos noutros momentos, pero esa cifra reduciuse por decisións de gobernos anteriores”, lembrou.
A responsable municipal indicou que o Concello está en proceso de cubrir 12 prazas máis, tres delas de carácter inmediato, e que para compensar as carencias de persoal se está a recorrer ás horas extraordinarias, ás que recoñeceu depender de maneira transitoria. Louzao confirmou que as horas atrasadas quedarán pagadas na nómina de novembro, ata o mes de maio deste ano, e destacou que xa se realizou un primeiro pago a comezos de 2025.
Respecto ás reivindicacións salariais presentadas por bombeiros e Policía Local, explicou que están en proceso de negociación coa Concellería de Persoal, tanto no relativo ao complemento específico como á compensación de horas extra, e recordou que xa se aplicaron melloras derivadas da promoción interna dos C2 a C1, o que supuxo “un incremento económico importante este ano”.
Louzao tamén pediu “responsabilidade co conxunto da cidadanía” ao colectivo, ao considerar que a súa decisión de non completar as quendas con horas extra “non é responsable” e “crea alarma innecesaria”. Afirmou que o goberno municipal leva semanas en contacto cos representantes dos bombeiros e que a alcaldesa, Goretti Sanmartín, mantivo este luns unha reunión co corpo para avaliar a situación e pedirlle colaboración. “É unha problemática prolongada no tempo, pero este goberno está a facer esforzos para mellorar as condicións e reforzar o servizo”, engadiu.
A portavoz apuntou que a situación actual é consecuencia de anos de restricións e amortizacións de prazas, así como das limitacións legais na reposición de efectivos e na cobertura de baixas nun servizo con alta especialización. “Non se poden facer substitucións como noutros postos da administración, e iso complica moito a xestión das quendas”, indicou.
Louzao reiterou que o executivo local é o primeiro que eleva a taxa de reposición ao 125%, o máximo permitido pola lei, e insistiu en que o obxectivo é acadar “un parque de bombeiros dotado de forma suficiente e estable”.
ASUNTOS APROBADOS POLA XUNTA DE GOBERNO
A portavoz aproveitou a súa comparecencia para repasar tamén os principais asuntos tratados na Xunta de Goberno Local. Entre eles, destacou a concesión de tres licenzas de obra maior: unha para a construción dunha vivenda unifamiliar illada en Cortos, na parroquia de Marantes; outra para a reforma da cuberta dun inmoble na rúa do Castiñeiriño, 72; e unha terceira destinada ao acondicionamento enerxético da fachada dun edificio na rúa de Teo, 37.
No ámbito da contratación, o Concello autorizou a licitación dun servizo de apoio ás actuacións de gobernanza e participación do proxecto Eco-Bosque Río Sar, que forma parte do Plan de Recuperación, Transformación e Resiliencia financiado pola Unión Europea. O contrato, cun orzamento base de 67.793,88 euros, ten un prazo de execución de catro meses e abrangue tarefas de asistencia técnica, organización de mesas temáticas, talleres, rutas e actividades de voluntariado, ademais da elaboración de enquisas, informes e material didáctico.
Este proxecto inclúe actuacións de restauración do ecosistema fluvial do río Sar, como a estabilización de marxes, a recuperación da vexetación de ribeira, a eliminación de especies invasoras e a potenciación da diversidade faunística, así como a conservación do Carballo de Conxo.
Tamén se aprobou convocar unha nova licitación para a naturalización da Lagoa do Auditorio e a restauración fluvial do río Corgo, dentro do programa ‘Entre Sar e Sarela’, cun orzamento de 826.965,69 euros (IVE incluído). Louzao explicou que o anterior concurso quedara deserto e que, ao exceder o prazo de execución o exercicio actual, o expediente tramítase como anticipado de gasto con condición suspensiva, á espera de que a Fundación Biodiversidade confirme a prórroga dos fondos europeos solicitada polo Concello.
A Xunta de Goberno aprobou tamén a adxudicación do contrato mixto de iluminación de Nadal por dous anos á empresa ‘Iluminación Santiago SSL’, por un importe de 568.700 euros, e que inclúe melloras como once arcos luminosos, dezaseis elementos singulares e doce iluminacións de árbores naturais adicionais aos previstos inicialmente.
Ademais, o executivo local solicitará unha subvención de 12.500 euros á Deputación da Coruña para o mantemento da Escola Municipal de Música, no marco do programa provincial de axudas a conservatorios e escolas de danza municipais.
No apartado de urxencias, ampliouse ata o 15 de novembro o prazo de xustificación do convenio de colaboración coa Federación de Asociacións Veciñais do Rural de Santiago (FERUSA).
Por último, Louzao anunciou a apertura do período de inscrición da 17ª edición do concurso gastronómico Santiago(é)tapas, que se celebrará entre o 19 de febreiro e o 8 de marzo de 2026, e que chega con novas categorías e criterios de valoración. O certame dividirase en tres modalidades —tradicional, creativa e doce— e contará con cinco premios adicionais, entre eles os de mellor tapa vexetariana ou vegana e mellor tapa elaborada con produto con denominación de orixe ou indicación xeográfica protexida de Galicia.
As novidades explicaranse nun café informativo o martes 25 de novembro, dirixido aos establecementos interesados en participar, co obxectivo de consolidar e mellorar o certame gastronómico máis emblemático da cidade.
