O portavoz do Partido Popular de Santiago, Borja Verea, anunciou hoxe que o seu grupo “porá en marcha as medidas necesarias para que Santiago conte con máis presenza policial nas rúas e evitar o aumento da inseguridade”. O dirixente popular afirmou que levan “máis de dous anos advertindo do incremento de problemas que perturban a convivencia”, pero que “o goberno do BNG e Compostela Aberta sempre responde negando a súa existencia e acusándonos de alarmistas”.

Verea mostrouse sorprendido polas declaracións da alcaldesa Goretti Sanmartín, quen recentemente asegurara que “moita policía crea alarma entre a veciñanza”. Fronte a iso, o líder popular defendeu a necesidade de “reforzar a vixilancia, aumentar efectivos, instalar cámaras de vídeo vixilancia e mellorar a iluminación pública”, medidas que, segundo dixo, xa funcionan noutras cidades.

As súas declaracións producíronse tras unha reunión no Parlamento de Galicia na que participaron tamén representantes veciñais e colectivos cidadáns, como Roberto Almuiña, da Asociación Veciñal Fonseca; Patricia Quintás, de Raigame; e un representante de Fegacústica. Pola parte do Grupo Popular, acompañaron a Verea as deputadas Katherinie Varela e Felisa Rodríguez.

Durante o encontro, analizaron o aumento do ruído e dos conflitos nocturnos nas rúas compostelás e o incremento de episodios que, segundo o PP, “alteran a convivencia e xeran alarma social”. Entre eles, mencionou “acampadas en soportais, narcopisos e consumo de drogas na vía pública”.

O tamén deputado autonómico fixo especial referencia á situación na praza de Cervantes, que cualificou de “extrema e intolerable”. Asegurou que “o senfogarismo é unha realidade que en vez de ir a menos vai a máis”, e acusou ao goberno local de non ofrecer unha resposta adecuada: “os servizos e recursos municipais son claramente insuficientes”.

Verea advertiu de que esta situación “xera tensión social, malestar entre comerciantes e preocupación na veciñanza”, polo que pediu unha “intervención municipal urxente e inmediata”. Tamén lembrou que hai persoas sen fogar noutras zonas da cidade, como os soportais de Correos, Xoán XXIII, Galeras ou o Parque do Restollal, pero que o caso de Cervantes “conleva unha especial alarma social e mesmo risco sociosanitario”.

O líder popular concluíu cuestionando a actuación municipal: “Se dous rapaces en Cervantes están a beber e son multados, como pode unha persoa permanecer 24 horas ameazando aos comerciantes sen que se actúe? Cantas infraccións e delitos debe cometer alguén para que o Concello interveña?”.