Os concelleiros do Partido Popular de Santiago, Nerea Barcia e Adrián Villa, puxeron en valor este venres o aumento do investimento da Xunta de Galicia nos ámbitos de Política Social e Vivenda. Segundo explicou Barcia, os Bonos de dependencia incrementaranse nun 41%, ata acadar nove millóns de euros, unha partida que permitirá beneficiar a preto de 380 persoas en Santiago.
Pola súa parte, Adrián Villa destacou que en 2026 abrirase na cidade o primeiro centro público de coidados intermedios de Galicia, un proxecto pioneiro destinado a mellorar a atención ás persoas maiores. O edil sinalou tamén que o Bono Concilia Familia chegou xa a uns 400 fogares composteláns, e lembrou que se manterá por cuarto ano consecutivo a gratuidade nas escolas infantís, de maneira que 1.900 nenos e nenas de Santiago se beneficiarán dun programa que supón 3,3 millóns de euros de investimento.
En materia de vivenda, Barcia subliñou que Santiago disporá de preto de cinco millóns de euros para a construción de vivenda pública e aloxamentos compartidos para menores de 36 anos, entre eles os situados na rúa Xoán XXIII. Ademais, apuntou que grazas aos orzamentos autonómicos a cidade contará con solo para máis de 3.400 novas vivendas.
Os representantes populares concluíron que a Xunta “continuará investindo en servizos e infraestruturas sociais, unha oportunidade para seguir mellorando a vida das familias en Santiago”.
