O secretario xeral do PSOE de Santiago, Aitor Bouza, acusou este xoves ao presidente da Xunta, Alfonso Rueda, de volver “castigar” á capital galega cos orzamentos autonómicos de 2025. Bouza afirmou “non entender como o PP e Borja Verea se alegran” dunhas contas que, ao seu xuízo, relegan á cidade.
Nunha rolda de prensa, o dirixente socialista criticou que a Xunta faga “anuncios grandilocuentes” sobre investimentos en Compostela que logo “non se reflicten nas partidas”. “Cando se vai ao detalle, non se atopan”, asegurou, poñendo como exemplo a dotación para o Estatuto da Capitalidade, cifrada en 3 millóns de euros, unha cantidade “inferior á consignada no ano 2009”.
“Non entendemos esas felicitacións. O PP e o señor Verea non teñen motivo ningún para alegrarse”, insistiu Bouza, quen anunciou que o PSOE compostelán continuará reclamando que o fondo da capitalidade se eleve “polo menos aos sete millóns de euros”.
O secretario xeral socialista engadiu que os orzamentos tampouco recollen investimentos suficientes en áreas clave como a sanidade e a educación, lembrando as reformas pendentes nos colexios Vite e López Ferreiro.
Bouza advertiu ademais de que o voto favorable de Borja Verea, portavoz do PP no Concello e deputado autonómico, “será unha traizón absoluta a todos os veciños de Santiago”. “Agás que rectifiquen esa achega da capitalidade aos sete millóns, apoiar esas contas é traizoar á cidade”, afirmou, aínda que matizou que “todo pode ser negociado”.
Tamén reprochou á Xunta o “desprezo” cara á capital por non convocar “ano tras ano” o Consello da Capitalidade, órgano previsto para coordinar políticas e investimentos coa administración autonómica.
En relación ao pleno ordinario que se celebrará a próxima semana no Pazo de Raxoi, Bouza sinalou que o grupo socialista manterá unha “oposición construtiva”. “O noso pacto é cos veciños de Santiago: cando as medidas sexan positivas para a cidade, apoiarémolas; cando non o sexan, votaremos en contra, como fixemos coa subida da taxa do lixo”, concluíu.
DENUNCIAN DEMORAS NO TRASLADO DE PACIENTES DA ÁREA DE SANTIAGO
O PSOE compostelán denunciou este xoves “demoras inaceptables” no traslado de pacientes da área de Santiago e reclamaron á Xunta medidas urxentes para mellorar o transporte sanitario e reducir as listas de espera. Así o trasladaron este xoves o deputado socialista no Parlamento de Galicia e secretario xeral do PSOE compostelán, Aitor Bouza, xunto co responsable de Sanidade e Política Social da executiva local, Brais Botana.
Nunha rolda de prensa ofrecida na sede do PSOE local, Botana alertou de que se producen “unhas demoras de 14, 15 e 16 horas” que consideran que son “inaceptables” no traslado de pacientes, tanto de forma programada como tamén en momentos puntuais de forma urxente.
O socialista responsabilizou ao modelo de externalización do servizo e á falta de recursos propios do Sergas da situación, ao asegurar que é “un sistema que se basea por completo en concesións que son completamente privadas” e que isto, ao final, fai que o propio 061 non dispoña de ambulancias adicionais fose da rede urxente e limite a capacidade para poder responder como sistema.
