A concelleira socialista Marta Abal denunciou este domingo o “estado lamentable” do tramo do río Sar ao seu paso pola Ponte do Sar, en Santiago de Compostela, debido á falta de mantemento e á abundante maleza que medra sen control. A edil advertiu que esta situación “amosa o abandono do Goberno local” e urxiu actuacións inmediatas para recuperar o coidado da contorna.
Segundo indicou Abal, o Grupo Municipal Socialista xa presentara hai meses unha proposta para crear un plan anual de mantemento de infraestruturas e espazos urbanos, coa finalidade de evitar escenas como a que se vive actualmente no Sar. “O deterioro da zona ofrece unha imaxe degradada do río e, mentres o Goberno local segue sen actuar, é a veciñanza quen sofre as consecuencias”, afirmou a concelleira.
A socialista instou ao executivo de Goretti Sanmartín a “deixar de poñer escusas” e a garantir a limpeza e o respecto polo entorno urbano: “Queremos limpeza, coidado e respecto polo noso entorno urbano”, subliñou.
Dende o grupo municipal lembran ademais que o plan anual de mantemento foi aprobado polo Pleno a proposta do PSdeG, e critican que o actual Goberno municipal non o estea a executar nin a dar resposta ás necesidades máis urxentes da cidade.
