O concelleiro do Partido Popular de Santiago, Adrián Villa, responsabilizou este sábado á alcaldesa Goretti Sanmartín da “caótica situación” do Refuxio de Bando e da decisión de sacrificar tres cans acordada recentemente polo Padroado da Fundación Refuxio de Bando, cos votos favorables de BNG, Compostela Aberta e PSOE.
Villa, que participou esta mañá na manifestación convocada en Santiago contra os sacrificios e para reclamar melloras nas instalacións, acusou á rexedora de “deixación de funcións” por “non asistir nunca ás reunións do Padroado” e por “non terse preocupado nos últimos dous anos da situación destas instalacións, nin dos traballadores nin dos animais que alí se atopan”.
O edil popular sostén que “houbo múltiples advertencias” sobre o risco de incidentes como o rexistrado recentemente, cando un can atacou a un traballador do centro. Segundo indicou, “isto demostra a total falta de sensibilidade polo benestar animal” e a ausencia de dirección política no refuxio.
Villa subliñou que o PP foi o único partido que non votou a favor do sacrificio dos tres cans, ao considerar que “no caso do animal que atacou ao traballador e previamente á súa familia, era evidente a necesidade de actuar conforme ao informe veterinario”, pero que “non había motivos para incluír os outros dous cans na mesma decisión, xa que non existían informes nin antecedentes que o xustificasen”.
O concelleiro lembrou que o Partido Popular leva dous anos e medio advertindo do colapso do Refuxio de Bando, “polo exceso de animais, o deterioro das instalacións e a falta de espazo”, sen que o Goberno local “tomase medidas para mellorar a situación nin para ampliar o número de canís de seguridade”. Estes espazos, explicou, “permitirían traballar con cans potencialmente perigosos e ofrecerlles unha segunda oportunidade”.
Por último, Villa lamentou que “tivese que producirse un episodio grave” para que se aprobase finalmente un protocolo de actuación con animais perigosos, medida que, segundo o edil, “chega demasiado tarde, despois de moitos avisos por parte do persoal do refuxio”.
