O portavoz do Partido Popular de Santiago, Borja Verea, reclamou este sábado a paralización inmediata da venda de solo público promovida polo goberno local de BNG e Compostela Aberta, e instou a destinar esas parcelas á construción directa de vivenda 100% pública. O popular fixo este chamamento tras coñecer que, segundo os datos publicados esta semana, o proceso de venda municipal só conseguiu adxudicar dúas parcelas.
Segundo Verea, este resultado “evidencia a falta de xestión e de iniciativa do executivo nacionalista”, ao que acusou de “pretender facer un negocio obsceno desfacéndose do solo público de todos os santiagueses”. O tamén deputado autonómico insistiu en que “é unha mágoa que se venda solo público cando se podería construír vivenda pública e accesible”.
O líder popular puxo cifras ás súas críticas: os pisos resultantes das promocións privadas, dixo, “terán como mínimo un prezo de 180.000 euros por 80 metros cadrados”, mentres que as vivendas públicas que propón o PP serían “subvencionadas e poderían custar arredor de 100.000 euros, ao non incluír beneficio industrial nin prezo do solo”.
Verea acusou o goberno de BNG e Compostela Aberta de “despatrimonializar a riqueza común” e de actuar “contra o interese público para favorecer ás construtoras privadas”. “Todas as cidades están a ceder solo para levantar vivenda pública, menos Santiago”, afirmou.
O popular lembrou que nos últimos dez anos, coincidindo cos mandatos de Compostela Aberta, BNG e PSOE, “o alugueiro medio na cidade pasou de 390 a 623 euros, un incremento do 60%”, e engadiu que “2024 foi o ano co maior aumento interanual da historia nos prezos do alugueiro”.
Entre as medidas que o PP pretende impulsar cando goberne, Verea destacou a creación dunha Empresa Pública de Vivenda, dun Banco Público de Vivendas en alugueiro e dun Estatuto do Propietario en Aluguer para ofrecer garantías aos donos que decidan poñer os seus pisos no mercado. Tamén propón bonificacións no IBI, actualización das normas do casco histórico para facilitar a rehabilitación e modificacións do Plan Xeral de Ordenación Municipal que permitan novas construcións en solo dispoñible.
Outras das propostas dos populares inclúen o reforzo das Áreas de Rehabilitación Integral, a conversión de baixos comerciais en vivendas en barrios como Conxo e Santa Marta, e un paquete de medidas fiscais e administrativas dirixidas a incentivar o alugueiro e ampliar o parque público municipal.
