O Movemento Sumar Galicia anunciou este sábado en Santiago de Compostela o lanzamento dunha Iniciativa Lexislativa Popular (ILP) baixo o lema ‘Por unha vivenda digna no noso país’, coa intención de reformular o marco legal galego en materia de vivenda. A proposta, impulsada en colaboración con diversas organizacións sociais, pretende dar resposta ás actuais dificultades de acceso á vivenda, especialmente entre a mocidade.
O secretario xeral de Sumar Galicia, Paulo López, explicou que nas próximas semanas se presentarán o texto e a comisión promotora da ILP. O obxectivo, dixo, é superar a normativa vixente desde 2012 mediante un novo texto que aposte por “unha maior porcentaxe de vivenda de promoción pública, garantías reais para mobilizar inmobles baleiros cara ao alugueiro, un réxime sancionador efectivo para as vivendas turísticas e un tope aos prezos do alugueiro en liña coa lexislación estatal”.
López sostivo que é preciso “adaptar os aspectos positivos da Lei 12/2023 a unha realidade nova”, de modo que “a cidadanía galega, e en particular a xente nova, poida acceder a unha vivenda digna”.
Pola súa banda, a portavoz de Sumar no Congreso e presidenta de Sumar Galicia, Verónica Barbero, sinalou que a situación actual converteu a vivenda “nunha aspiradora de riqueza das clases traballadoras, unha extracción cara aos rentistas”. Criticou que tanto o PP como o PSOE manteñen unha concepción baseada “na falsa idea de que o mercado se autoregula”, o que, ao seu ver, perpetúa a especulación e o encarecemento.
Barbero defendeu a necesidade de abandonar as políticas que incentivan a compra especulativa e de avanzar cara a un modelo no que a vivenda sexa considerada “un dereito e non un ben de investimento”.
