O voceiro socialista no Concello de Santiago, Aitor Bouza, respondeu ás declaracións de Borja Verea sobre unha posible moción de censura, reiterando que o PSOE non apoiará ningún movemento que facilite un goberno do Partido Popular.
Bouza afirmou que “a cidadanía de Compostela falou claro e meridiano” nas eleccións municipais e que non outorgou ao PP o respaldo suficiente para gobernar. O edil subliñou que os socialistas non só manteñen esa posición por unha cuestión interna de partido, senón porque “a veciñanza que votou ao Partido Socialista non quere que o señor Verea goberne esta cidade”.
Segundo o portavoz, o líder popular “non asumiu o resultado electoral” e busca “aproveitar unha conxuntura no Concello para tentar sumar apoios inexistentes”. Bouza engadiu que nin a cidadanía nin ningunha outra forza política expresaron apoio a Verea, polo que considerou que calquera tentativa de moción sería un intento de “perverter o resultado das urnas”.
O secretario xeral dos socialistas acusou a Verea de “empregar unha bomba de fume” para distraer do seu labor parlamentario, no que, segundo dixo, “vota sistematicamente en contra dos intereses de Compostela”. Bouza anunciou que o PSOE manterá unha vixilancia activa tanto no Parlamento como no propio Concello sobre as decisións do PP, e reclamou a Verea que sexa “coherente” e defenda os intereses da cidade antes de aspirar a gobernala.
