O Ateneo de Santiago abrirá o curso 2025-2026 o vindeiro luns, 6 de xuño, ás 19:30, cunha conferencia a cargo de Carmen Calvo, presidenta do Consello de Estado. A intervención, que leva por título Estruturas e Fortalezas da Democracia, poderá seguirse en directo a través da canle de YouTube do Ateneo.
A conferencia de Calvo será tamén o inicio dunha nova edición dos Luns do Ateneo, o ciclo máis lonxevo da institución compostelá. Durante a súa exposición, a relatora abordará os desafíos que afrontan hoxe as democracias, incidindo nos mecanismos que lles permiten manter solidez e estabilidade institucional. Ademais, analizará os pilares fundamentais da cidadanía, a igualdade e os dereitos humanos como elementos chave para garantir a convivencia.
Carmen Calvo, nacida en Cabra (Córdoba) en 1957, é doutora en Dereito Constitucional pola Universidade de Córdoba e licenciada en Dereito Público pola Universidade de Sevilla. Exerceu como vicepresidenta primeira do Goberno e foi ministra en diferentes áreas, ademais de presidir a Comisión de Igualdade do Congreso. En marzo de 2024 asumiu a presidencia do Consello de Estado. Xunto á súa carreira política e académica, destaca tamén como autora e activista feminista, con presenza habitual nos medios de comunicación.
