A alcaldesa de Santiago, Goretti Sanmartín, participou esta mañá na marcha solidaria contra o cancro, onde salientou o papel da sociedade na loita contra esta doenza. “É importantísimo porque significa sensibilizar sobre esta doenza e, sobre todo, sobre a investigación”, subliñou, lembrando que os avances en tratamentos e na mellora da calidade de vida das persoas diagnosticadas “fanse grazas á solidariedade coa asociación do cancro”.
Sanmartín destacou tamén o éxito da convocatoria deste ano, que superou o número de participantes respecto da pasada edición, e avanzou que durante a xornada se mostrará, ademais, “todo o que se conseguiu en materia de investigación”.
En paralelo, a rexedora contestou a preguntas dos medios sobre o debate da taxa turística, que conta cun recurso presentado por parte do sector hoteleiro. Explicou que as alegacións municipais aínda non foron entregadas e que se prevé facelo “o luns, tras a sesión coa asesoría xurídica”. Pese a este trámite, asegurou que “dende a perspectiva do Concello está todo listo” para que o imposto de estadías entre en funcionamento.
Ás críticas dunha parte do sector, Sanmartín respondeu que se trata dunha medida “que veu para quedar, que xa está implantada en moitas cidades de Europa” e que supón unha achega “modesta en contía, pero importante como beneficio para a cidade, ao reforzar a actividade turística”.
Sobre o caso Esproi, limitouse a sinalar que “a xustiza falou e cando fala o resto da xente o que temos que facer é acatar as sentenzas”, sen entrar en máis valoracións.
