O Pleno do Concello de Santiago de Compostela non sacou adiante este xoves a aprobación definitiva da ordenanza municipal de xestión de residuos, polo que quedan en pausa as modificacións previstas no servizo de recollida, sobre todo na cidade histórica e na incorporación e reforzo de bioresiduos. A sesión plenaria de hoxe tivo lugar, de maneira excepcional, na Biblioteca do Consello da Cultura Galega, debido ás obras no Pazo de Raxoi que afectan ao salón de plenos.
O concelleiro de Servizos Básicos, Xesús Domínguez (BNG), abriu o punto lembrando que a norma pretendía actualizar a vixente dende 2008. Segundo explicou, o texto recollía “a regulación integral da recollida porta a porta na zona vella, a separación de todas as fraccións con trazabilidade e o reforzo dos bioresiduos para compostaxe”, ademais de “mecanismos de transparencia e información periódica á veciñanza”. Domínguez pediu o voto favorable ao considerar que a ordenanza era un instrumento “moderno, claro e eficaz” para cumprir co marco autonómico, estatal e europeo.
A concelleira Mila Castro avanzou o apoio dela e dos concelleiros non adscritos. Sinalou que o texto “respecta en boa medida a ordenanza marco da FEMP” e que non introduciría cambios substanciais na prestación do servizo respecto do que xa recolle o contrato en vigor: “Agora trasládase ao papel unha realidade que xa está en marcha”, dixo, citando a implantación do quinto colector. Sobre os horarios, apuntou que “as fraccións reciclables poderán depositarse en calquera momento, agás o vidro por razóns de convivencia”.
Pola súa banda, o grupo PSOE anunciou o voto en contra. A voceira Marta Abal cualificou o texto de “enfarragoso” e cuestionou a súa seguridade xurídica: “Vulnérase o principio de reserva de lei ao deixar en mans de disposicións da Alcaldía ou das áreas delegadas a creación de novas obrigas”, afirmou, citando artigos que, ao seu xuízo, permitirían modificar fraccións e exclusións do sistema sen pasar polo Pleno. Abal insistiu ademais en que o procedemento “foi tramitado ás costas do tecido social, industrial e económico”, e reclamou reformular a ordenanza e abrir un novo período de exposición pública tras as 47 alegacións presentadas.
O grupo PP, a través de Adrián Villa, tamén se posicionou en contra. Para o popular, o documento evidencia “falta de diálogo” coas entidades e impón horarios e requisitos “difíceis de cumprir” para a veciñanza. Villa sostivo que moitas das achegas cidadás “quedaron fóra” e vinculou o rexeitamento coa situación xeral da limpeza urbana: “É unha boa noticia para moitos veciños”, resumiu.
No turno de réplica, Xesús Domínguez lamentou que o traballo técnico realizado “non sexa avalado” e afeou que se empregue o debate para reforzar discursos sobre a sucidade da cidade: “Resulta decepcionante que unha ferramenta para mellorar o servizo non prospere”, afirmou. A alcaldesa, Goretti Sanmartín, pechou a quenda subliñando o cambio de posición do PSOE respecto da aprobación inicial do 24 de abril de 2025 e enmarcou o debate nun modelo de residuos que “aposte pola reciclaxe e a separación” fronte a outras opcións. Abal replicou que “o principio de legalidade” cuestionado non é unha opinión, senón que “o recolle un informe da asesoría xurídica”.
Cos votos en contra de PSOE e PP, a ordenanza non superou a votación definitiva. O goberno local deberá decidir agora os seguintes pasos: abrir unha nova negociación política, reaxustar o articulado e, de ser o caso, expor de novo o texto a información pública para tentar un consenso que permita avanzar cara aos obxectivos de recollida selectiva e prevención de residuos en Compostela.
