O Grupo Municipal Socialista avanzou este martes a súa posición ante o Pleno: apoio ao recoñecemento extraxudicial de crédito polos gastos do transporte colectivo —“case tres millóns de euros”, precisou Gumersindo Guinarte— e voto favorable á modificación da chamada “ordenanza paraugas” de ingresos municipais (que atinxe IBI, ICIO e Imposto de Circulación). Pola contra, os socialistas rexeitarán a aprobación definitiva da ordenanza de xestión do servizo do lixo e a aprobación inicial da ordenanza fiscal que actualiza a taxa de recollida, transporte e tratamento de residuos.
Guinarte celebrou que o recoñecemento extraxudicial do bus regrese á orde do día: “Non hai ningunha razón para que non saia adiante; xa no mandato anterior se aprobaron recoñecementos iguais con informes idénticos”. Sobre as ordenanzas de ingresos, avanzou a coincidencia co paquete proposto polo Goberno local, incluído o recargo do IBI ás vivendas baleiras: “Compartimos a medida para incentivar o retorno ao mercado”, aínda que advertiu de dúbidas sobre a súa eficacia práctica.
A fronte principal do desacordo sitúase no lixo. A voceira socialista Marta Abal pediu retirar e rehacer a ordenanza de prestación do servizo, que cualificou de insegura xuridicamente: “Advertiuse no informe de asesoría que se vulnera o principio de reserva de lei ao relegar a instrucións e ordes de servizo cuestións que deben estar na ordenanza”. Segundo explicou, 47 entidades presentaron alegacións e, “baixo a escusa de erros materiais”, o texto incorpora modificacións de fondo: “Reescríbense artigos; como mínimo debería abrirse un novo período de exposición pública”. O PSdeG reclama volver iniciar a tramitación e dialogar cos sectores afectados.
No plano técnico, Abal enumerou as eivas detectadas: ambigüidade e discrecionalidade do articulado; habilitación para introducir novas obrigas vía normas de desenvolvemento (por exemplo, novas fraccións de reciclaxe ou límites de entrada de residuos comerciais non perigosos con régime sancionador asociado); baleiro sobre o procedemento de entrada/saída do sistema para produtores comerciais; e carga burocrática excesiva ao solicitar datos que xa constan en plataformas autonómicas e estatais: “Non podemos pedir ás empresas información que xa están remitindo a outras administracións”.
Respecto da ordenanza fiscal da taxa do lixo, o PSdeG xustifica o seu voto en contra no estado actual do servizo: “É evidente que non se está cumprindo o contrato: faltan vehículos e maquinaria, non está operativa a infraestrutura informática, non se limpan os contedores coa frecuencia esixida nin se substituíron todas as illas soterradas”, resumiu Abal. Coa prestación “cuestionada como nunca”, a formación considera indefendible “subir unha taxa que pagan todas as persoas contribuíntes”. Tamén reprocha falta de diálogo e pedagoxía: “Correspóndelle ao Goberno explicar o porqué e o como, por exemplo a referencia ao valor catastral na tarificación doméstica”.
Os socialistas demandan axustar a taxa á realidade do servizo por zonas —rural/urbano, ensanche/casco histórico— e revisar os coeficientes da tarifa non doméstica: “Non ten sentido que o restaurante pague o dobre ca cafetería cando moitas cafeterías funcionan na práctica como restaurantes”.
Sobre o contrato do lixo —adxudicado no mandato anterior—, Guinarte lembrou que a selección seguiu criterios regrados, pero situou a responsabilidade no Goberno municipal: “Quen debe esixir o cumprimento estrito é o Goberno; se hai que limpar contedores cada 15 días, debe facerse. Se as sancións non mudan a dinámica, haberá que explorar outras solucións”.
En vivenda, o PSdeG apoiará o recargo do IBI ás vivendas baleiras, pero pide acoutar mellor o obxecto de actuación e elaborar un estudo rigoroso, con prazo, sobre o parque desocupado: “Un criterio como que non haxa persoas empadroadas non abonda e pode saturar os servizos municipais sen resultado”.
Ao fío doutras cuestións da cidade, Guinarte tamén se referiu ao Conector Central, cualificándoo de elemento estruturante que require solucións que minimicen impactos e compatibilicen accesos a centros escolares e á Praza de Abastos: “Non se pode cortar e peonalizar sen máis; hai condicionantes que hai que equilibrar”.
