O portavoz do Partido Popular en Santiago, Borja Verea, abriu este luns o curso político 2025/2026 cunha rolda de prensa na que fixou como meta electoral “conseguir en 2027 a maioría máis grande da historia da cidade”. Segundo afirmou, ese resultado permitiría un “cambio real e total” na capital galega, fronte ao que cualificou como “un goberno de tripartito fallido”.
Verea destacou que o seu grupo leva rexistradas máis de 400 iniciativas e propostas no que vai de mandato e asegurou que o PP se mantén “por diante dun goberno decepcionante, sen argumentos e incapaz de resolver os principais problemas da cidade”. Entre estes asuntos citou a xestión do transporte urbano, as roturas de tubaxes e o contrato da auga, a limpeza viaria, o tráfico e o acceso á vivenda. “Santiago necesita liderado e non improvisación”, sinalou.
No apartado de turismo, o portavoz popular cuestionou o recente anuncio do executivo municipal, ao que acusou de limitarse a “contratar unha consultoría de 30.000 euros”. Cualificou a medida como “de chichinabo” e instou a deseñar “estratexias serias” en diálogo co sector. “O ADN de Santiago é ser unha cidade aberta e universal, e iso require programación cultural de nivel e un plan de turismo ambicioso”, apuntou.
Verea tamén se referiu á tramitación da declaración de Santiago como zona tensionada no mercado da vivenda, lembrando que o seu grupo xa advertira da necesidade de correccións nos datos e no cronograma. Segundo dixo, a rectificación anunciada polo goberno local demostra “unha xestión infantil e de profunda bisoñez”.
En relación coa polémica sobre a praza de protocolo, o portavoz popular advertiu que “é grave sinalar a unha funcionaria para xustificar un erro político”. Se ben evitou acusar directamente á alcaldesa de mentir, sostivo que “un goberno debe protexer os seus traballadores, non utilizalos como escudo”.
O dirixente popular concluíu insistindo na súa meta electoral: “Non falamos só de maioría absoluta, falamos da maioría máis ampla da historia de Santiago. A diana está posta e o obxectivo é claro”.
