O Grupo Municipal Socialista de Santiago de Compostela denunciou este venres a “falta de previsión” do executivo que lidera a alcaldesa Goretti Sanmartín na preparación dos centros de educación infantil e primaria para o inicio do curso.
Segundo explicaron, foron as traballadoras do servizo de limpeza quen trasladaron que os labores de posta a punto, previstos para o mes de agosto segundo recolle o contrato, non se iniciarán ata o 1 de setembro, a escasos días da apertura das aulas.
A situación agrávase, apuntan, porque en varios centros se están a realizar obras de mantemento e reparación, o que incrementa a carga de traballo e obriga ao persoal a “redobrar esforzos” para cumprir cos prazos. Para os socialistas, este contexto pode derivar en que alumnado e profesorado se atopen con instalacións “con po, restos de obra e sen as condicións mínimas de hixiene e salubridade”.
O PSdeG considera “inadmisible” que non exista un reforzo suficiente do servizo nestas datas e reclama ao Concello que adopte medidas inmediatas para garantir que os colexios estean preparados antes do regreso da comunidade escolar. “Esiximos que o goberno municipal actúe con responsabilidade e reforce de inmediato os equipos de limpeza”, subliñaron.
