O concelleiro do Partido Popular en Santiago, José Antonio Constenla, instou ao goberno local a iniciar de inmediato os traballos para que a capital galega presente a súa candidatura a Cidade Creativa da UNESCO na categoría de artesanía e artes populares. O prazo para presentar propostas remata en marzo de 2026.
Segundo explicou, a candidatura debería contar coa supervisión da Asociación Ourives de Compostela e co apoio da Xunta de Galicia, a Deputación da Coruña, a Universidade de Santiago e o Centro UNESCO de Galicia. O edil considerou fundamental que o executivo local “poña seriedade e traballo” para artellar unha proposta que beneficie tanto a cidade como a súa contorna e provincia.
Constenla destacou a importancia histórica e económica da orfebrería compostelá, lembrando que grandes museos internacionais como os de Londres, Chicago, Berlín, Roma ou Xerusalén xa inclúen pezas compostelás nas súas coleccións. Na actualidade, segundo apuntou, máis de 300 profesionais desenvolven o seu labor neste sector en Santiago, que considerou “un factor cultural, patrimonial, identitario e tamén económico”.
O concelleiro popular sinalou que a inclusión de Compostela na Rede de Cidades Creativas permitiría activar un modelo de crecemento vinculado á tradición, ao talento e á innovación, favorecendo que a creatividade se transforme en produtos e servizos con alto valor engadido.
A Rede de Cidades Creativas da UNESCO, creada en 2004, integra hoxe máis de 180 urbes que recoñecen a creatividade como motor de desenvolvemento urbano sustentable, cohesión social e dinamización cultural. En España xa forman parte desta rede cidades como Sevilla (Música), Bilbao (Deseño), Granada (Literatura), Burgos e Denia (Gastronomía) e Barcelona (Literatura).
