A alcaldesa de Santiago, Goretti Sanmartín, participou este xoves no acto de apertura do simposio internacional ‘Walking the talk for Dementia’, unha iniciativa promovida pola asociación Agadea Alzheimer que reúne en Compostela a persoas vinculadas á investigación, á atención e ao activismo social en torno ás demencias. No encontro tamén interveu a presidenta de Agadea, Isabel Gey, xunto coas participantes que previamente percorreron o Camiño de Santiago desde Sarria como actividade previa ao simposio.
No seu discurso de benvida, Sanmartín reiterou o compromiso do Concello de Santiago co colectivo de persoas afectadas e coas súas familias. “Estamos aquí, convosco, non só nesta inauguración, senón tamén no día a día; e segundo, non imos esquecer”, sinalou, incidindo na importancia da continuidade do apoio institucional.
A rexedora destacou que a prioridade do goberno local é manter políticas centradas nas persoas e na saúde mental, reforzando a rede de coidados e impulsando iniciativas de recoñecemento e memoria colectiva. “Imos seguir apostando por políticas que poñan no centro as persoas, a saúde mental, a rede de coidados. Imos seguir recuperando memoria, nomeando, recoñecendo. Porque cando unha cidade lembra, é unha cidade máis viva. E cando coida das súas persoas, é unha cidade máis forte”, afirmou.
O simposio internacional, que se desenvolve estes días en Compostela, conta cun programa de mesas de debate e actividades orientadas a compartir boas prácticas e experiencias de acompañamento ás persoas con demencia e ás súas familias, situando a cidade como referente na acollida de iniciativas de carácter sociosanitario.
