O Partido Popular de Santiago, a través do seu concelleiro José Ramón de la Fuente, denunciou o estado de deterioro no que se atopa o local social de Laraño, que segundo afirmou presenta múltiples deficiencias que afectan ao normal desenvolvemento das actividades. O edil puxo como exemplo a suspensión das clases de informática “porque os ordenadores levan todo o ano avariados”.
Entre as anomalías, De la Fuente destacou os problemas de climatización, que obrigaron a suspender sesións en varias ocasións, a aparición de humidades nas salas de reunión, a limpeza insuficiente e a ausencia de mantemento regular. O concelleiro tamén apuntou a existencia de mobiliario roto desde hai meses, o uso do baño adaptado como almacén, a falta de saída de emerxencia no salón de actos e o mal estado dos accesos, con fochancas e deficiencias na iluminación exterior que “impiden organizar actividades ao aire libre”.
No exterior, o popular alertou do risco que supón o parque infantil, xa que non conta cun valado completo e os vehículos aparcan entre os elementos de xogo. “Nesta situación non cumpre normativa de seguridade e resulta perigoso para os cativos”, afirmou.
De la Fuente enmarcou esta situación dentro da “mala xestión do goberno nacionalista” en materia de centros socioculturais. Criticou que os contratos da rede, que segundo dixo levan máis dun ano redactados, seguen sen ser licitados, e prorrogáronse malia as denuncias de usuarios, traballadores e empresas concesionarias. “Os servizos non se están prestando adecuadamente, hai falta de persoal e de material, e numerosas actividades foron suspendidas”, engadiu.
O concelleiro do PP instou ao executivo local a acelerar a licitación dos contratos para que os centros poidan ofrecer os servizos previstos e a veciñanza dispoña de instalacións en condicións. “Non se entende que, tras tantos anuncios, sigan sen sacar adiante os novos contratos”, concluíu.
