O Partido Popular de Santiago, a través da súa concelleira Yolanda Otero, presentou unha proposta para que o Concello adopte novas medidas destinadas a garantir a plena inclusión das persoas con discapacidade auditiva e xordocegas.
Segundo explicou a edil, a iniciativa busca que “toda a veciñanza teña acceso en condicións de igualdade á información e á comunicación coa súa contorna”. Entre as actuacións que reclama figuran a creación dun servizo de lingua de signos no portal web municipal, a instalación de bucles magnéticos en edificios públicos, a organización de talleres de lingua de signos nos centros socioculturais e a colocación de paneis informativos co alfabeto de signos en espazos públicos.
Otero tamén destacou a necesidade de impulsar cursos de formación en lingua de signos para o persoal municipal, co obxectivo de mellorar a atención á cidadanía, así como a posta en marcha dunha campaña municipal entre o 20 e o 26 de setembro, coincidindo coa Semana Internacional das Persoas Xordas.
A concelleira popular incidiu en que “a plena inclusión debe ir acompañada de compromisos reais por parte do goberno local”, que, ao seu xuízo, ten a responsabilidade de eliminar barreiras non só físicas, senón tamén de comunicación.
Para Otero, estas actuacións terían un impacto directo na mellora da calidade de vida das persoas xordas e con discapacidade auditiva, permitindo avanzar en accesibilidade, igualdade de oportunidades e non discriminación. “As cidades son os espazos nos que se desenvolve a vida cotiá, polo que a accesibilidade universal resulta esencial para garantir os dereitos fundamentais e a participación plena da cidadanía”, concluíu.
