O Partido Popular de Santiago acusou ao executivo local de non desenvolver unha política clara en materia de xuventude, malia que o Pleno municipal aprobara por unanimidade a elaboración dun Plan Estratéxico.
O concelleiro popular Borja Rubio asegurou que existe “unha total ausencia de dirección política” neste ámbito e reclamou a posta en marcha dun Plan Municipal de Xuventude “participativo, transversal e ambicioso”, con medidas en emprego, vivenda, formación, voluntariado, lecer e cultura.
Rubio afirmou que “levamos dous anos vendo como a única proposta dos nacionalistas se resume en accións illadas sen rumbo, sen avaliación e sen impacto real”. O edil sostivo que a mocidade compostelá “segue invisible para quen goberna” e comparou a situación coa doutras cidades “onde se avanza mentres aquí seguimos no cartaz e na improvisación”.
O representante do PP tamén denunciou que non se coñecen medidas específicas de vivenda para a xente moza, malia ser unha das súas principais preocupacións. Engadiu que a oferta de lecer “non pode reducirse a actividades puntuais nun único lugar da cidade” nin a formación “a cursos illados sen continuidade”.
Segundo Rubio, o goberno local “prefire facer un acto conxuntural que sentar as bases dun proxecto de cidade para a xuventude”. Nesta liña, advertiu de que os barrios seguen sen programación nin acompañamento municipal, polo que demandou accións concretas e estables que dean resposta ás necesidades do colectivo.
