O concelleiro do Partido Popular en Santiago, Adrián Villa, instou ao executivo municipal do BNG a dar unha resposta definitiva ás constantes avarías do ascensor de Triacastela, unha infraestrutura posta en marcha en 2019 para salvar o desnivel entre os Concheiros e a avenida de Lugo.
Segundo denunciou Villa, o elevador acumula problemas técnicos de forma reiterada, con especial impacto sobre as persoas maiores e con mobilidade reducida. “A ineptitude do goberno nacionalista, que non é quen de manter funcionando un ascensor, é cada vez máis desesperante”, sinalou. O edil popular lembrou que en abril houbo unha avaría que tardou máis de quince días en repararse e que posteriormente se optou por unha solución provisional que acabou fallando de novo en xullo. “Agora, pasado só un mes, volve a estar inutilizado”, indicou.
O concelleiro recordou que o actual goberno local, cando se atopaba na oposición en 2023, xa advertira dos problemas de mantemento desta instalación. “Parece que se esqueceron desta reclamación e non fan nada por evitar que isto siga ocorrendo”, afirmou.
Villa explicou que recibiu múltiples chamadas de veciños e veciñas da zona mostrando a súa indignación polo mal funcionamento do ascensor e reclamou que o executivo municipal asuma responsabilidades. “Esiximos que o goberno do BNG pida desculpas públicas e poña en marcha un plan de mantemento para evitar que se repita esta situación”, concluíu.
