A concelleira do Partido Popular en Santiago, María Baleato, acusou hoxe en rolda de prensa ao goberno municipal de “incompetencia” e “soberbia” tras coñecerse que a Xunta de Galicia deu por desistida a solicitude do Concello para declarar Santiago como zona de mercado residencial tensionado. Na súa comparecencia ante os medios, Baleato responsabilizou directamente ao executivo liderado por Goretti Sanmartín de non ter achegado a documentación necesaria no prazo establecido.
Segundo explicou, a administración autonómica solicitara ao Concello que completase certos documentos para continuar co procedemento, pero non se produciu a resposta requirida, o que motivou o arquivo da solicitude. “Non é tan difícil, só hai que coñecer a lei e remitirlle á Xunta o que pide”, afirmou Baleato, quen sostén que a normativa estatal e galega establece con claridade os pasos a seguir para obter a declaración.
A concelleira popular rexeitou que esta decisión teña motivacións políticas, como sostivo o goberno municipal, e insistiu en que se trata dunha cuestión de cumprimento legal: “A decisión non é política, é xurídica. A Xunta actuou con legalidade, seguridade xurídica e lealdade institucional”. Tamén asegurou que a Consellería de Vivenda ofrecera unha reunión entre os técnicos do Instituto Galego de Vivenda e Solo (IGVS) e os do Concello de Santiago, pero que esta fora rexeitada pola alcaldesa.
Baleato comparou o caso compostelán co da Coruña, cuxo goberno bipartito do PSOE e BNG obtivo xa a declaración tensionada para o seu municipio, a pesar de ter iniciado o proceso despois de Santiago. “Se tramitas correctamente, obtés a declaración; se non, como fixo este goberno, non”, apuntou.
Durante a rolda de prensa, Baleato tamén respondeu ás preguntas dos xornalistas sobre a súa posición con respecto á declaración de zona tensionada. Aclarou que o PP non levaba esta proposta no seu programa electoral, pero que estaría disposto a estudala se se acredita que cumpre os requisitos legais. Entre as súas medidas en materia de vivenda, mencionou a creación dun bono de alugueiro para incentivar a saída ao mercado de vivendas baleiras e a modificación do plan especial para permitir vivendas máis pequenas e accesibles.
A concelleira afirmou, ademais, que parte da documentación presentada polo Concello non era suficiente nin estaba correctamente elaborada, e acusou ao goberno local de “improvisación” e de empregar portais telemáticos sen validez xurídica para presentar documentación clave. “Se un documento leva por título ‘memoria’, pero non contén os contidos exixidos pola lei, non vale”, argumentou.
Baleato rematou a súa intervención cunha crítica máis ampla á política de vivenda do goberno local, ao que acusou de fracasar na promoción pública, na mobilización de solares e na regulación do alugueiro turístico. “Suspenso tras suspenso”, sentenciou, esixindo ao executivo que abandone a confrontación coa Xunta e reitere a solicitude, esta vez, con toda a documentación esixida.
