O Partido Popular de Santiago, a través da súa concelleira Yolanda Otero, instou ao Goberno municipal a poñer en marcha un Plan Municipal de Infancia e Adolescencia que permita ordenar e priorizar as políticas públicas dirixidas aos menores da cidade. A popular lembrou que Compostela carece na actualidade dun Consello Municipal da Infancia e Adolescencia e tampouco está adherida á rede de Cidades Amigas da Infancia promovida por UNICEF, circunstancia que, ao seu xuízo, reflicte un atraso na planificación municipal nesta materia.
Segundo Otero, esta ferramenta debera fundamentarse en tres eixos estratéxicos: protección, prevención e participación, e debería contar coa implicación activa tanto do tecido social que traballa co colectivo infantil e xuvenil como dos propios nenos, nenas e adolescentes. A concelleira defendeu que “hai que traballar nun instrumento que promova a coordinación necesaria para dar resposta ás súas necesidades e favoreza a súa participación activa na vida pública local”.
O plan municipal que reclama o PP debería, ademais, aliñarse cos obxectivos da Axenda 2030, incorporando accións encamiñadas a crear entornos seguros, inclusivos e estimulantes para a infancia e adolescencia, coa finalidade de garantir o pleno exercicio dos seus dereitos.
A edil subliñou que “o benestar social da infancia e adolescencia de Compostela depende en gran medida da acción municipal”, polo que o Concello ten a responsabilidade de deseñar unha cidade pensada desde a mirada da infancia, atenta aos desafíos emerxentes e aos problemas sociais que afectan á veciñanza máis nova.
“A infancia e adolescencia exercen unha cidadanía activa e son membros de pleno dereito da sociedade democrática”, sinalou Otero, que advertiu da necesidade de incorporar as súas opinións, necesidades e dereitos na política municipal, apostando por unha xestión que se traduza nun modelo urbano inclusivo, accesible e garante de oportunidades para todos e todas.
O Partido Popular xa formulou no pasado iniciativas neste sentido e insiste agora na súa reivindicación como paso imprescindible para cumprir os compromisos da Convención dos Dereitos do Neno de 1989 e reforzar o papel de Santiago como cidade comprometida co desenvolvemento social e humano das xeracións máis novas.
