O Partido Popular de Santiago de Compostela denunciou hoxe publicamente os actos de vandalismo rexistrados na súa sede o pasado mércores 25 de xuño. Nunha rolda de prensa ofrecida polos representantes populares José Ramón de la Fuente e Adrián Villa, a formación conservadora asegurou que un grupo de persoas protagonizou un “escrache” fronte ás instalacións do partido, que estaban pechadas nese momento, e esixiu ao Bloque Nacionalista Galego que condene os feitos.
Segundo explicou De la Fuente, os participantes na acción “arrancaron cartelería política do Partido Popular” situada na entrada da sede e deixaron pegadas “pegatinas e mensaxes propias” nas reixas e na fachada. A formación presentou ante os medios fotografías e vídeos nos que, segundo indicaron, se pode identificar a persoas portando “bandeiras coa imaxe do BNG e da CIG”.
De la Fuente subliñou que as imaxes permiten comprobar “como se concentran diante da sede, arrancan os carteis do PP e poñen os seus propios”. Por este motivo, anunciou que xa presentaron unha denuncia na Comisaría da Policía Nacional en Santiago, porque “non van tolerar ningún tipo de intento de amedrentamento, presión, chantaxe ou violencia”.
Pola súa banda, Adrián Villa lamentou que “o goberno do BNG non condenase estes feitos no Pleno Municipal”, ao que cualificou dunha “oportunidade perdida” por parte da alcaldesa Goretti Sanmartín para actuar como “rexedora de todos os composteláns”. O portavoz popular considerou que se trata dun “ataque violento” e esixiu unha resposta clara por parte do BNG.
“Pedimos ao BNG que investigue se as persoas que participaron pertencen ao seu partido e, se é así, que o comuniquen á Policía Nacional e que as expulsen da organización”, afirmou Villa. Engadiu que este tipo de accións supoñen unha “vulneración da convivencia democrática” e que lonxe de intimidar ao PP, serven para reforzar o seu compromiso co pluralismo político e co traballo “por Santiago e polos santiagueses”.
A formación conservadora reiterou que non permitirá ningún tipo de coacción e que manterá a súa actividade política con firmeza, en defensa do que consideran os valores democráticos e o respecto institucional. Por agora, nin o BNG nin as organizacións aludidas responderon publicamente ás acusacións lanzadas polos populares.
