O Bloque Nacionalista Galego presentará este martes en Santiago de Compostela as súas propostas para facer fronte á crise de acceso á vivenda, centradas na creación dun parque público baseado no alugueiro e non na venda, como medida estrutural para garantir unha oferta habitacional “estable e suficiente”. A cita terá lugar na Casa das Máquinas, nunha xornada de debate que contará coa participación de diversos perfís políticos e profesionais do sector.
A portavoz nacional do BNG, Ana Pontón, encabezará o acto xunto coa arquitecta e exconselleira de Vivenda e Solo, Teresa Táboas, quen ocupou o cargo entre 2005 e 2009 no Goberno galego. No programa tamén están previstas intervencións de expertos universitarios, xestores de cooperativas de vivenda, representantes de entidades sociais que traballan pola inclusión, e responsables políticos do propio BNG.
A deputada nacionalista Alexandra Fernández advertiu da gravidade da situación actual, que cualificou como “unha das maiores crises de acceso á vivenda” en décadas. “Nunca se construíu tanta vivenda e nunca foi tan difícil acceder a ela”, sinalou, asegurando que esta realidade “agranda a brecha entre quen non ten patrimonio e quen si o ten”, converténdose así “no maior mecanismo de desigualdade social do momento”.
A través desta iniciativa, o BNG pretende “arroxar luz sobre esta crise” e formular solucións concretas que contrasten coa “falta de resposta do goberno do PP”, ao que acusa de non actuar fronte á escalada dos prezos do alugueiro. Fernández insistiu en que o “goberno alternativo do BNG ten claro que a vivenda é unha prioridade” e que debe ser tratada como “un ben esencial ao que deben poder acceder todos os galegos”.
