O partido Unión de Ciudadanos Independientes (UCIN) rexistrou este pasado luns un documento oficial no Concello de Santiago con 13 demandas prioritarias para os barrios da Volta do Castro e O Rial, que, segundo afirman, levan anos “esquecidos polos distintos gobernos municipais”. O escrito foi presentado por Diego Adrián Mallo Cao, coordinador local da formación, quen instou ao goberno municipal a poñer en marcha un plan de actuación integral con prazos definidos.
Entre as reclamacións recollidas, UCIN destaca cuestións que afectan directamente á mobilidade, seguridade e calidade de vida da veciñanza. Entre elas, solicítase o traslado dos contedores de lixo ao punto acordado coa asociación veciñal, a instalación dunha marquesiña de autobús, e o arranxo urxente do firme e das beirarrúas, moitas das cales están nun estado que as fai impracticables.
Tamén se reclama a rehabilitación dos parques infantís, que segundo UCIN non cumpren coa normativa europea vixente, así como melloras na iluminación pública, especialmente nas inmediacións da fonte da zona, actualmente cuberta de maleza. Ademais, sinalan a inseguridade que provoca o túnel baixo a autoestrada, onde xa se produciron incidentes, e denuncian o abandono no mantemento de sumidoiros e postes eléctricos, xunto coa falta de conexión viaria adecuada coa Avenida de Ferrol.
UCIN acusa ao Concello de discriminación institucional, asegurando que se impide o traslado duns contedores alegando motivos de seguridade, mentres se autoriza a mesma operación noutra rúa próxima. “É incomprensible que haxa barrios con tantas carencias mentres se anuncian millóns de euros en proxectos no centro”, declarou Diego Mallo, quen tamén subliñou que “os veciños pagan impostos como todos, o que non teñen son os mesmos servizos”.
A formación pide que o goberno local atenda estas 13 demandas mínimas, considerando que son necesarias para garantir a dignidade, a seguridade e a igualdade territorial, e advirte que manterá o seu seguimento sobre a resposta municipal ás súas propostas.
