O Grupo Municipal Socialista do Concello de Santiago anunciou este domingo que presentará unha proposición no pleno do 26 de xuño para instar á Xunta de Galicia a aceptar os fondos do novo Plan Estatal de Vivenda 2026-2030, ofrecidos polo Goberno central. O voceiro socialista, Sindo Guinarte, defendeu esta iniciativa como unha oportunidade clave para incrementar o parque público de vivenda en Galicia e, en particular, en Santiago de Compostela.
Segundo explicou Guinarte, a proposta responde ao rexeitamento inicial do presidente da Xunta, Alfonso Rueda, a esta liña de financiamento, expresado na Conferencia de Presidentes celebrada o pasado 6 de xuño. O plan estatal prevé unha achega de 380 millóns de euros para Galicia, cos que se poderían construír 4.000 vivendas públicas.
“Non foi comprensible ese primeiro rexeitamento”, declarou o voceiro municipal, quen valorou de forma positiva o cambio de postura amosado polo presidente galego nos últimos días. Con todo, Guinarte considera que a Xunta debe asumir compromisos concretos, como elevar ata o 40% o seu financiamento directo da vivenda pública, e poñer en marcha un novo Plan Galego de Vivenda en colaboración coas administracións locais.
O portavoz socialista salientou ademais que o novo Plan Estatal inclúe medidas estruturais relevantes, como a blindaxe do parque público fronte á especulación inmobiliaria e mecanismos de control da transparencia dos prezos de mercado. A este respecto, sinalou que a cidade de Santiago debería ter un papel protagonista na demanda e esixencia da súa aplicación.
Actualmente, en Santiago de Compostela hai máis de mil persoas inscritas no Rexistro de Demandantes de Vivenda, o que para Guinarte evidencia a necesidade urxente de aumentar a oferta pública. O grupo socialista considera que estes fondos constitúen unha oportunidade estratéxica que non pode desaproveitarse, e que require da implicación activa da Xunta xunto aos concellos.
