A concelleira do Partido Popular de Santiago, Olaya Otero, denunciou este luns o retraso na licitación da infraestrutura viaria do Orbitaliño, unha conexión chamada a mellorar as comunicacións entre os polígonos industriais da cidade e que, segundo a representante popular, continúa “totalmente paralizada” un ano despois do seu anuncio.
A obra, que foi presentada polo Ministerio de Transportes e Mobilidade Sostible durante a inauguración do Orbital, debería estar xa licitada, segundo os compromisos adquiridos daquela. Porén, Otero critica que non houbo avances significativos, e atribúe esta situación a unha “falta de interese” por parte do goberno municipal, liderado polo BNG, formación que comparte responsabilidades co Executivo central.
“Os composteláns seguimos esperando por unha infraestrutura fundamental para o desenvolvemento económico e industrial da cidade“, afirmou a edil. Ademais, sostén que esta demora está a prexudicar o tecido produtivo da comarca, xa que “sen unha rede viaria eficaz será imposible atraer investimento empresarial” e avanzar na diversificación económica que precisa Santiago.
A conexión do Orbitaliño está pensada para unir os polígonos da Sionlla e Costa Vella coa N-550, facilitando tamén o acceso á variante de Aradas e á estrada de Carballo. Segundo Otero, trátase dunha actuación estratéxica que debería ser prioritaria para calquera goberno local que se preocupe polo futuro económico de Compostela.
A popular acusou ao BNG de non ter un proxecto claro para o sector industrial, malia levar dous anos no goberno local, e reprochou que non se coñeza ningunha planificación concreta nin medidas para mellorar o estado dos polígonos industriais do concello.
Finalmente, pediu ao executivo municipal que “asuma as súas responsabilidades” e reclame aos seus socios do Goberno estatal o cumprimento dos compromisos adquiridos coa cidade. “Dispor de infraestruturas axeitadas e ben conectadas é fundamental para atraer investimento e fomentar o desenvolvemento industrial”, concluíu Otero.
