O Movemento Sumar Galicia aprobou este sábado, na súa reunión da Coordinadora Nacional, o Protocolo de Federación co espazo estatal de Movimiento Sumar. O documento regula as bases da súa relación política en termos organizativos, electorais e económicos, e será agora sometido a debate no órgano correspondente de ámbito estatal.
Segundo explicou o secretario xeral, Paulo Carlos López, trátase dun paso fundamental que “nos garante autonomía política plena e á vez integración nos órganos estatais”. O texto recolle o recoñecemento da soberanía organizativa de Sumar Galicia, ao tempo que asegura a súa participación funcional e política no marco común estatal.
O protocolo baséase nos principios de lealdade e cooperación, segundo recolle a formación. “Queremos un Estado plurinacional e para iso construímos unha organización plurinacional”, afirmou o propio Paulo Carlos López ao remate da sesión.
Este movemento prodúcese no contexto de consolidación do espazo político de Sumar en Galicia, onde a formación busca reforzar o seu perfil autonómico, mantendo a conexión co proxecto político estatal liderado por Yolanda Díaz. Con este acordo, Sumar Galicia aspira a manter voz propia nas decisións que afecten ao conxunto do Estado, sen renunciar á súa identidade territorial.
