A agrupación local de UCIN Compostela lanzou este luns unha dura crítica contra o goberno municipal de Santiago de Compostela, coincidindo co segundo aniversario da súa constitución. O grupo, sen representación no pleno, denunciou un aumento da inseguridade cidadá e unha “sensación de abandono” nos barrios por parte do executivo composto por BNG e Compostela Aberta, con apoio do PSOE.
Nun comunicado difundido o 16 de xuño, UCIN sinala que durante os dous anos de mandato producíronse “incidentes violentos, roubos e actos vandálicos” en distintas zonas da cidade, como Volta do Castro, Conxo, San Pedro, Vite ou o Ensanche, e atribúe esta situación á “falta de presenza policial” e á “escasa resposta ás queixas veciñais”.
A formación propón un plan integral de seguridade cidadá que inclúa catro eixos principais: reforzo da presenza policial nos barrios, instalación de cámaras de vixilancia en zonas con maior conflictividade, mellora da iluminación pública e unha atención directa ás denuncias da veciñanza.
O coordinador local de UCIN, Diego Adrián Mallo, afirmou que “Santiago non pode seguir sendo só un decorado turístico” e engadiu que “os seus veciños merecen vivir tranquilos, con seguridade e co apoio dun Concello que escoite e actúe”. Segundo a formación, o actual mandato estivo marcado pola “propaganda e abandono”.
UCIN Compostela pechou o seu comunicado reafirmando o seu compromiso cunha política “centrada nas persoas” e na dignidade dos barrios, e reivindicou a necesidade dunha “alternativa valente, práctica e presente no día a día da veciñanza”.
O goberno municipal non respondeu polo momento a estas acusacións. A crítica de UCIN súmase ás manifestacións de distintos actores políticos e sociais nas últimas semanas, coincidindo co balance do ecuador do mandato por parte do executivo.
