A concelleira do Partido Popular de Santiago, Yolanda Otero, reclamou este xoves a intervención inmediata do Concello no tramo do río Sarela que atravesa o parque de Galeras, denunciando o seu estado de abandono e a presenza de maleza e vexetación descontrolada.
Segundo a representante popular, a situación é tal que “a canle do río nin sequera se ve en determinados puntos”, debido á acumulación de arboredo e matogueira, e engadiu que “as saídas das augas pluviais están taponadas pola vexetación”, o que contribúe á deterioración da contorna.
Otero fixo fincapé na responsabilidade do goberno municipal, ao que acusa de “inoperancia” e de non garantir a adecuada conservación dos espazos naturais da cidade. Afirmou que “a veciñanza ten dereito a gozar de zonas de desfrute en condicións axeitadas” e que a administración local “ten a obriga da súa preservación e adecuación”.
A edil sinalou que a limpeza e o mantemento do patrimonio natural e público son fundamentais para garantir a calidade de vida na cidade e lamentou que “a imaxe deplorable que ofrece o Sarela ao seu paso por Galeras” reflicte, na súa opinión, a “desidia do goberno local”.
Finalmente, Otero advertiu que “o deterioro da cidade é manifesto” e que as queixas da veciñanza sobre a limpeza viaria, parques e xardíns “son diarias”. A súa intervención forma parte da campaña de fiscalización que o grupo municipal do Partido Popular está a realizar en distintos puntos de Santiago, cun foco especial nos servizos públicos e o estado das infraestruturas urbanas.
