A portavoz municipal do BNG en Santiago, Míriam Louzao, cargou este mércores contra o Partido Popular tras a difusión dun vídeo no que o seu portavoz municipal, Adrián Villa, compara o festival O Son do Camiño coas festas tradicionais da cidade. Para Louzao, a peza audiovisual publicada polo PP “retrata unha forma de actuar irrespectuosa e arrogante” e supón unha utilización das institucións municipais con fins partidistas.
Segundo afirmou, o vídeo protagonizado por Villa non só busca o “beneficio político” do PP local, senón que tamén “despreza” o traballo cultural continuado que se desenvolve na cidade. Para a nacionalista, non é equiparable un evento masivo, “financiado con recursos públicos exorbitados e orientado ao negocio de grandes empresas”, coas festas populares compostelás, organizadas en clave comunitaria e cun forte vínculo co tecido cultural da cidade.
Louzao criticou tamén que, na súa mensaxe, o concelleiro popular ignorase os custos que o macrofestival supón para o Concello de Santiago, en materia de seguridade, limpeza e transporte. “Pagámolo todos e todas”, lembrou, ao tempo que botou en falta un chamamento por parte do PP á responsabilidade das empresas organizadoras e do público para evitar molestias ao conxunto da veciñanza.
O grupo municipal do BNG advertiu que non é aceptábel que un representante da corporación desprece desde o seu cargo institucional as políticas culturais da cidade, nin se presente como “experto musical” sen base para iso.
Louzao concluíu a súa crítica afirmando que o PP “compra cultura ao peso” e ignora o traballo de numerosos colectivos e artistas locais que ofrecen propostas culturais ao longo de todo o ano e que non teñen cabida nos macrofestivais financiados con fondos públicos. “Nin ética nin estética”, sentenciou, en referencia á actuación do PP e do seu concelleiro.
