O portavoz do Partido Popular en Santiago, Borja Verea, expresou a súa satisfacción polo recente apoio manifestado por colectivos veciñais á proposta de que a parcela do antigo Colexio Peleteiro sexa adquirida polo Concello e destinada a usos públicos, unha iniciativa que, segundo subliñou, o seu partido leva anos defendendo.

“Sempre apostamos pola compra municipal deste espazo como un investimento estratéxico para o Ensanche“, lembrou Verea, quen cualificou esta zona como “a última oportunidade” para transformar o barrio cara ao século XXI. Neste sentido, o líder popular valorou positivamente que a cidadanía “se organice e faga propostas que coinciden co noso modelo de cidade”, apostando por un novo “corazón” para o Ensanche.

Segundo o ex candidato á alcaldía, “hai que recuperar a titularidade pública deste solar” e rexeitar a construción de novos bloques residenciais. No seu lugar, defendeu a creación de equipamentos comunitarios e a incorporación de servizos públicos dos que, di, carece actualmente esta zona da cidade. Entre as dotacións propostas polo PP figuran unha residencia de maiores, un centro de día, zonas verdes, instalacións deportivas, unha piscina climatizada, parques infantís e unha praza pública aberta ao conxunto da veciñanza.

Verea contrastou esta proposta coa actitude doutras forzas políticas, ás que acusou de continuar “apostando polo ladrillo, o pelotazo e políticas urbanísticas do pasado”. En cambio, asegurou que o PP ofrece unha “alternativa firme e solvente” para garantir que o espazo se destine a satisfacer necesidades reais da cidadanía compostelá.