O PSOE compostelán inicia unha nova etapa baixo a continuidade de Aitor Bouza como único candidato á Secretaría Xeral da agrupación local. Media hora despois de pecharse o prazo de presentación de candidaturas, o actual líder socialista comparecía en rolda de prensa para confirmar que encabeza a única candidatura rexistrada e que será proclamada oficialmente na asemblea prevista para mañá, sábado 7 de xuño.
Bouza asegurou que a súa proposta “non representa só unha persoa, senón a todo o partido”, e destacou que a nova executiva municipal incorpora membros de “todas as sensibilidades” da militancia. Segundo indicou, trátase dun equipo que aposta por continuar co proceso de renovación iniciado en outubro de 2023 tras a crise interna vivida no seo da agrupación.
Durante a súa intervención, o secretario xeral destacou que “o Partido Socialista da cidade está hoxe máis forte e cohesionado“, tras un ano e medio de traballo centrado na “reconstrución interna” e na apertura da sede á participación. Bouza afirmou que agora o obxectivo é recuperar a confianza cidadá cun proxecto “ambicioso, crible e compartido cos barrios, asociacións e entidades” da cidade.
A nova etapa busca consolidar a coordinación co grupo municipal, actualmente composto por dous edís, Gumersindo Guinarte e Marta Aval, aos que Bouza agradeceu expresamente o seu traballo. Tamén puxo en valor a mellora do clima interno, que definiu como “radicalmente oposto” ao vivido anteriormente, e que permite “tomar as decisións en conxunto” entre a dirección orgánica e os cargos institucionais.
Bouza fixo fincapé en que o seu único “pacto” é coa veciñanza de Santiago e sinalou a súa intención de contrapoñer o proxecto socialista ao que cualificou como unha “falta de propostas sólidas” por parte do goberno municipal liderado por Goretti Sanmartín. Así mesmo, comprometeuse a abordar cuestións que considera prioritarias, como a crise de vivenda, a saturación dos servizos públicos ou o abandono do rural.
En resposta ás preguntas dos medios, Bouza subliñou que a existencia dunha soa candidatura é “un reflexo do apoio maioritario da militancia” e un sinal de “unidade” nun momento que considera clave para o futuro do partido na cidade. Segundo avanzou, os nomes da nova executiva faranse públicos mañá durante a asemblea, respectando así os tempos internos.
Para o líder socialista, esta etapa non é só unha continuidade, senón tamén “un punto de inflexión para relanzar o PSOE en Santiago” e facelo “referente dunha cidade que necesita volver situarse na vangarda política e social”.
