O portavoz do Partido Popular de Santiago, Borja Verea, fixo este venres un chamamento público a favor da unidade social e institucional para preservar a Facultade de Medicina da USC como único centro universitario en Galicia con estudos completos nesta área. O líder popular expresou a súa preocupación pola posibilidade de que se impulsen novos graos de Medicina noutras cidades galegas, o que cualificou como ‘un ataque inxustificado’ ao prestixio dunha institución que considerou “referente mundial”.
Durante a súa intervención, Verea reivindicou a centralidade histórica e académica da Facultade de Santiago: “Non é só un edificio nin unha titulación: é o corazón académico de Galicia e símbolo de séculos de vocación, estudo e servizo á sociedade”. Neste sentido, advertiu que a creación doutras facultades non solucionaría os retos sanitarios nin educativos, senón que implicaría unha división de recursos, dificultando a planificación e xenerando desigualdades entre territorios.
O tamén concelleiro popular compostelán afirmou que ‘Santiago non pode ser castigada por facer ben as cousas’, e reclamou que se fortaleza e amplíe a actual facultade, en lugar de ‘trocear’ un modelo que considera eficaz e recoñecido. Para el, a Universidade de Santiago representa “o mellor de Galicia: excelencia, compromiso e humanidade”, polo que comprometeuse a defender sen matices a súa continuidade como único centro galego destes estudos.
Verea puxo como exemplo o modelo aeroportuario galego, que cualificou de ‘fracaso’ por culpa do “localismo sen xustificación”, e advertiu contra o risco de repetir ese erro no ámbito universitario. Segundo indicou, “tres aeroportos compiten mentres o de Porto medra sen competencia como referente do noroeste peninsular”. A súa proposta é, en cambio, aproveitar os puntos fortes de cada cidade e consolidar Santiago como capital universitaria da medicina.
Finalmente, fixo un chamamento á cidadanía e ás institucións para que defendan conxuntamente o prestixio do centro compostelán, que cualificou como ‘un orgullo común’ dos galegos, incluídos coruñeses e vigueses: “Non imos quedar calados mentres se pon en risco o seu prestixio”, asegurou, “nin vamos permitir que a cidade perda o que tanto lle custou levantar”.
