O Grupo Municipal Socialista de Santiago de Compostela levará ao Pleno do vindeiro 3 de xuño unha moción con motivo do Día Internacional contra a Homofobia, a Transfobia e a Bifobia, co obxectivo de facer fronte á crecente presenza de condutas LGTBIfóbicas e reforzar a defensa dos dereitos do colectivo desde o eido municipal.
Segundo explicou o seu voceiro, Gumersindo Guinarte, a intención é que esta moción poida ser asumida por todos os grupos e pase a ser unha declaración institucional. ‘Parécenos que sería o lóxico e o razoable nun momento en que as condutas e os comportamentos de odio están campando de xeito inasumible e inaceptable nunha sociedade que debe ser tolerante como a nosa’, afirmou.
A proposta inclúe medidas concretas que van desde o reforzo dos servizos de atención ás vítimas ata o lanzamento de campañas de sensibilización promovidas polo Concello. Tamén se contempla a formación específica da Policía Local en materia de diversidade sexual e de xénero, así como a incorporación de contidos sobre diversidade LGTBIQ+ tanto nos centros educativos como nas bibliotecas públicas da cidade.
Alén do ámbito municipal, o grupo socialista tamén dirixe demandas á Xunta de Galicia, á que instan a incrementar os recursos humanos e económicos destinados á aplicación efectiva da Lei autonómica LGTBIQ+. Entre as peticións inclúense tamén a elaboración de informes anuais sobre o impacto dos discursos de odio e que a administración galega actúe como acusación particular nos casos máis graves de agresións contra persoas LGTBIQ+.
“A defensa dos dereitos LGTBIQ+ non admite ambigüidades. As administracións locais debemos ser firmes á hora de responder e anticiparnos aos discursos de odio que, por desgraza, están a medrar co aval dalgunhas forzas políticas”, subliñou Guinarte, alertando da necesidade dunha acción coordinada e contundente.
A través desta moción, o PSdeG busca impulsar un compromiso institucional que consolide a imaxe de Santiago como unha cidade “aberta e plural”, facendo un chamamento ao resto da Corporación a sumarse a unha resposta conxunta que estea “á altura do que espera a cidadanía”. O debate no Pleno servirá, en palabras do grupo socialista, para reafirmar a defensa activa dunha sociedade libre de discriminacións.
