A alcaldesa de Santiago de Compostela, Goretti Sanmartín, participou este mércores nunha entrevista en Onda Cero, na que fixo balance do tempo transcorrido dende as eleccións municipais de maio de 2023, das que hoxe se cumpren dous anos. Sanmartín aproveitou para destacar algúns dos principais logros do seu goberno e apuntar os retos pendentes para a segunda metade do mandato.
A rexedora sinalou ademais que as festas da Ascensión son un dos momentos máis especiais do ano para a veciñanza, destacando o seu carácter familiar e social. “É o momento en que Compostela se atopa consigo mesma”, asegurou, convidando á cidadanía a participar das actividades culturais, concertos e tradicións como os cabezudos ou a banda municipal. Tamén pediu comprensión ante as críticas ao cartel festivo, defendendo a aposta polo talento local e galego, sen renunciar á presenza de artistas recoñecidos.
Durante a entrevista, a alcaldesa lembrou que se cumpren dous anos dende as eleccións municipais que lle deron ao Bloque Nacionalista Galego unha representación triplicada no pleno. Grazas ao acordo con Compostela Aberta, o BNG asumiu por primeira vez a alcaldía compostelá, tamén por vez primeira ocupada por unha muller. A alcaldesa valorou positivamente o traballo realizado polo goberno de coalición, que cualificou como “un equipo fantástico” centrado en mellorar o día a día da cidade.
Entre as medidas destacadas, mencionou o impulso dunha nova política de vivenda, que inclúe a aplicación da declaración de Santiago como zona de mercado residencial tensionado, a activación da taxa turística para reinvestir en servizos públicos e o desbloqueo de operacións urbanísticas como a da parcela de Peleteiro, onde se prevé construír vivenda protexida. A este respecto, indicou que os trámites administrativos están avanzando e que a súa complexidade require tempos longos de xestión.
Tamén puxo en valor as melloras na mobilidade urbana, como a implantación do bus directo ao aeroporto de Lavacolla e a planificación dunha reforma integral do transporte colectivo que inclúe autobuses nocturnos, reforzo das conexións co rural e reordenación das frecuencias. Outro dos anuncios realizados foron o traspaso da xestión municipal do aparcadoiro da Praza de Galicia a partir deste verán, coa intención de regular os prezos e unificar o modelo de xestión pública.
A entrevista tamén abordou outros temas de actualidade como a proliferación de ratas en barrios como Fontiñas, que segundo a alcaldesa está sendo combatida con campañas regulares de desratización, ou o estado da rúa Loureiros, onde se prevé unha intervención profunda no mes de xuño. Tamén reiterou o compromiso coa rehabilitación da Finca do Espiño, que se atopa pendente de dotación orzamentaria.
En canto ás festas do Apóstolo, a rexedora evitou adiantar detalles sobre os fogos ou o pregón, remitindo ás futuras comunicacións da concelleira de Festas. Non obstante, afirmou que a programación está “planificada con tempo” e destacou que a cidade conseguiu nos últimos anos ofrecer actos festivos participativos, diversos e de calidade.
Finalmente, Goretti Sanmartín reafirmou o seu compromiso coa veciñanza e co desenvolvemento dun modelo de cidade baseado na xustiza social, a sustentabilidade e a mellora da calidade de vida, apostando por políticas públicas dirixidas a todas as franxas da poboación.
