O Grupo Municipal Socialista de Santiago de Compostela presentará no Pleno do vindeiro 3 de xuño dúas iniciativas co obxectivo de visibilizar o que consideran unha inacción do Goberno local en dous ámbitos que cualifican de estratéxicos para o futuro da cidade: a venda de parcelas municipais incluídas no orzamento de 2025 e o estado de abandono do Parque de Carlomagno, no barrio das Fontiñas.
A primeira das propostas, formulada en forma de pregunta pola concelleira Marta Abal, pon o foco na falta de avances na venda de catro parcelas de titularidade municipal, previstas para este exercicio como fonte de financiamento dos investimentos recollidos nas contas locais. Segundo sinala o PSdeG, a estimación de ingresos pola venda destes terreos ascende a 5,8 millóns de euros, o que representa preto do 50 % do capítulo de investimentos do orzamento de 2025.
‘Se esas parcelas non se venden este ano, proxectos como a cociña central para os comedores escolares ou a compra de inmobles para servizos públicos non se van poder executar’, advertiu Marta Abal, quen denunciou que a día de hoxe non se iniciou sequera o procedemento de licitación. Os socialistas cualifican esta situación de irresponsabilidade grave, ao considerar que se están comprometendo actuacións sen garantir o financiamento necesario.
A segunda iniciativa, neste caso en forma de rogo, céntrase na situación do Parque de Carlomagno, espazo verde situado no barrio de Fontiñas. Segundo denunciou tamén Marta Abal, o parque atópase nun estado de mantemento deficiente, con zonas nas que ‘a herba chega, literalmente, á altura dos xeonllos’. Para o grupo socialista, esta situación transmite unha sensación de descoido por parte do Concello, polo que instan ao Goberno de Sanmartín a adoptar medidas urxentes para garantir o coidado regular do parque.
