O Grupo Municipal Socialista de Santiago de Compostela formulará no Pleno ordinario do vindeiro 3 de xuño unha pregunta dirixida ao Goberno local sobre o estado de deterioro que presenta a plataforma do aparcadoiro de Xoán XXIII. Así o anunciou o portavoz do grupo, Gumersindo Guinarte, quen alertou da aparición de danos estruturais significativos, especialmente no muro erguido durante a última intervención no espazo.
Segundo Guinarte, durante o anterior mandato executáronse obras de restauración e posta en valor da plataforma co obxectivo de mellorar a súa integración urbana e a súa utilidade como espazo público. Porén, nos últimos meses detectáronse degradacións notables, que preocupan ao grupo socialista tanto polo seu impacto visual como polos posibles riscos para a seguridade da cidadanía.
Ante esta situación, o PSOE local pide ao executivo de Goretti Sanmartín que aclare se coñece a orixe e a autoría dos danos e que especifique os prazos previstos para a súa reparación. “Queremos saber que está a pasar neste espazo, quen ou que provocou os desperfectos, e, sobre todo, cando se van solucionar para que a plataforma recupere o seu estado anterior”, sinalou o portavoz socialista.
O grupo considera que non actuar con celeridade podería agravar o problema, ademais de comprometer o uso cotián deste punto neurálxico de acceso ao centro histórico, situado nunha das principais portas de entrada para visitantes e residentes.
O aparcadoiro de Xoán XXIII é unha infraestrutura clave tanto desde o punto de vista da mobilidade urbana como polo seu potencial como espazo de uso cidadán. Por iso, os socialistas reclaman unha intervención rápida que evite que a situación continúe deteriorándose.
