A última enquisa publicada por Sondaxe revela cambios no mapa político de Santiago de Compostela. Segundo o estudo, o BNG consolidaría o seu ascenso cunha subida de 3,2 puntos en estimación de voto e conseguiría un concelleiro máis, pasando de seis a sete representantes no pleno municipal. Esa acta sairía da representación do PSdeG, que experimenta na capital galega a maior caída entre as sete cidades, cun descenso de 3,8 puntos respecto ás eleccións municipais de 2023.
O Partido Popular, liderado por Borja Verea, tamén incrementaría o seu apoio electoral, pero non se traduciría en máis concelleiros, polo que seguiría con 11 edís no consistorio compostelán.
A reacción dos partidos non se fixo agardar. Dende o BNG, valoraron nas súas redes sociais que, tras dous anos na alcaldía, ‘seguimos facendo cidade’ e que o incremento en apoio e representación amosa que o proxecto nacionalista ‘segue a ilusionar en Compostela’. Con esta proxección, o Bloque afianzaría a súa posición como forza de goberno e como opción preferente entre o electorado progresista.
No PSdeG, a valoración da enquisa correu a cargo do secretario xeral local, Aitor Bouza, que destacou que os datos mostran unha recuperación respecto á enquisa do ano pasado e evidencian que ‘estamos a reconstruír o vínculo coa cidadanía’. Aínda así, Bouza recoñeceu que ‘non nos conformamos’ e interpretou a perda de apoio como unha chamada de atención: ‘hai vontade de volver confiar no PSdeG’. O dirixente socialista sinalou ademais que o partido aspira a liderar unha alternativa progresista e lanzou críticas ao actual executivo local: ‘Santiago está sumida nunha parálise evidente’ e ‘a veciñanza merece algo máis ca un goberno que vive de vender fume’.
O secretario xeral socialista asegurou tamén que o partido continuará traballando “con humildade e ambición” para recuperar a confianza da cidadanía e volver conectar cun proxecto transformador para Compostela.
