O Grupo Municipal Socialista de Santiago levou este mércores ao pleno unha proposición para instar á Xunta de Galicia a retomar o proxecto de carril bici que uniría Compostela co Milladoiro. A proposta céntrase na necesidade de garantir un trazado accesible e respectuoso co entorno natural e patrimonial da zona de Conxo, un espazo que consideran de gran valor e que se viu afectado polas actuacións da administración autonómica.
Segundo denunciou o voceiro socialista Gumersindo Guinarte, o proxecto que impulsara a Xunta ignorou o traballo previo do Concello no marco dun proxecto europeo de recuperación ambiental e mobilidade sostible. A actuación autonómica desviouse dos núcleos urbanos de Santiago e Ames, escollendo un trazado que afecta zonas sensibles tanto desde o punto de vista histórico como natural.
O PSOE compostelán asegura que houbo informes desfavorables dentro da propia Xunta e que, malia iso, a administración optou por continuar coa execución, o que provocou a apertura de dilixencias por parte da Fiscalía Europea, ao solaparse o proxecto autonómico con outro que xa estaba en marcha e tamén financiado con fondos europeos.
A crítica dos socialistas non se limita ao trazado nin á xestión do proxecto, senón tamén á reacción posterior da Xunta, que, segundo indicou Guinarte, ameaza con deixar sen executar fondos europeos destinados á cidade como resposta ás críticas e mobilizacións veciñais. ‘Estamos ante unha actitude de represalia cara á cidadanía de Santiago e Ames, e en particular contra a veciñanza de Conxo, que se mobilizou para defender o seu patrimonio’, asegurou o portavoz.
Guinarte lembrou que na pasada lexislatura, os concellos de Santiago e Ames presentaran de forma conxunta un anteproxecto para un carril bici entre o Campus Sur e o Milladoiro, pensado como unha infraestrutura segregada do tráfico rodado e accesible para persoas con mobilidade reducida.
Desde o grupo socialista consideran que non hai incompatibilidade entre preservar o patrimonio e fomentar a mobilidade sostible, e reclaman que a Xunta de Galicia rectifique e retome o diálogo cos concellos implicados para buscar unha solución consensuada que permita executar o carril bici sen causar danos irreversibles no territorio.
A zona de Conxo, integrada en Santiago de Compostela desde hai cen anos, segue sendo un punto de fricción urbanística e ambiental, como demostran os reiterados conflitos sobre a súa protección. A proposta do PSOE chega nun momento clave, coa cidade inmersa en debates sobre o modelo urbano e o uso dos fondos europeos.
