O voceiro do Partido Popular no Concello de Santiago, José Antonio Constenla, censurou a xestión do goberno local na reorganización dos servizos municipais ante as obras previstas no Pazo de Raxoi, sede principal da administración compostelá. Segundo denunciou o edil, a reubicación do departamento de Urbanismo na Casa Jimena e Elisa Fernández de la Vega está a xerar importantes problemas laborais e operativos.
Constenla afirmou que a mudanza estaba prevista con antelación pero que, “como xa é habitual”, realizouse sen planificación e de maneira precipitada. O concelleiro popular puxo como exemplo a nova situación do Servizo de Licenzas, cuxo persoal —afirma— terá que traballar nun “espazo reducido, con pouca ventilación, entre caixas e equipos informáticos no chan”, compartindo tarefas administrativas coa atención ao público.
Dende o PP sosteñen que esta situación supón un perxuízo tanto para o persoal como para a cidadanía, que se atopa sen información clara sobre onde realizar trámites. Constenla asegura que “nin a alcaldesa nin o concelleiro responsable responderon ás queixas xa formuladas polos traballadores afectados”, o que interpreta como un sinal de desinterese polo benestar laboral e pola calidade da atención á veciñanza.
A formación popular alerta tamén de que o problema se prolongará no tempo, dado que as obras de mellora no Pazo de Raxoi se estenderán por máis dun ano, afectando especialmente a un departamento que, segundo o edil, xa sofre atrasos e conxestións.
Finalmente, o Partido Popular pediu que se busque unha solución alternativa que garanta unhas condicións dignas de traballo e unha atención axeitada ao público, e reclamou maior transparencia por parte do executivo municipal na xestión dos servizos durante o período de obras.
