Os grupos municipais do BNG, Compostela Aberta e Grupo Municipal Socialista presentarán no pleno de marzo do Concello de Santiago unha moción conxunta en apoio á manifestación convocada pola Plataforma SOS Sanidade Pública de Galicia o 6 de abril de 2025. A mobilización, que partirá ás 12:00 horas da Alameda compostelá con destino á Praza do Obradoiro, busca denunciar a situación da sanidade pública galega e reclamar melloras na atención sanitaria.
A convocatoria da manifestación responde, segundo os organizadores, á “nula resposta da Xunta de Galicia e da Consellaría de Sanidade” ás demandas do sector sanitario. Entre as principais preocupacións que motivan esta protesta, SOS Sanidade Pública denuncia o deterioro do sistema sanitario público, a saturación na atención primaria, os incrementos das listas de espera e a falta de recursos nos hospitais.
Así mesmo, a plataforma acusa ao Goberno galego de “desmantelar e privatizar” servizos sanitarios, o que consideran prexudicial para a calidade asistencial da poboación.
DEMANDAS DA PLATAFORMA
A moción que se levará ao pleno compostelán inclúe as principais reivindicacións da Plataforma SOS Sanidade Pública, que insta a unha serie de medidas urxentes para garantir unha atención sanitaria de calidade, con máis recursos para a atención primaria, con reforzo do persoal médico, de enfermaría e administrativo nos centros de saúde e nos puntos de atención continuada (PAC); optimización da atención hospitalaria, empregando todos os recursos dispoñibles en horario de mañá e de tarde para reducir as listas de espera; mellora da xestión orzamentaria, garantindo maior estabilidade laboral e reducindo a temporalidade do persoal sanitario; un plan específico para a saúde mental, que amplíe servizos e dote de máis especialistas este ámbito asistencial; recuperación dos servizos privatizados e reapertura das áreas sanitarias pechadas, e reforzo da saúde pública, con estratexias para previr e afrontar posibles crises sanitarias ou epidémicas.
CHAMAMENTO Á MOBILIZACIÓN DO 6 DE ABRIL
Os grupos municipais asinantes da moción chaman á cidadanía a participar activamente na manifestación do 6 de abril. A intención, segundo recolle a moción, é “dar visibilidade ao malestar da poboación e do persoal sanitario” ante as políticas da Xunta en materia de sanidade.
A protesta en Santiago de Compostela será un dos actos centrais dunha mobilización que busca ter impacto a nivel galego, sumando o apoio de diferentes colectivos sociais, sindicatos e entidades profesionais.
Coa presentación desta moción, o pleno do Concello de Santiago abordará a situación da sanidade pública en Galicia e o posicionamento institucional da capital galega fronte ás políticas sanitarias da Xunta.
