InicioPOLÍTICAGoretti Sanmartín presenta un 8M "feminista e lúdico" con actividades interxeracionais en...

Goretti Sanmartín presenta un 8M “feminista e lúdico” con actividades interxeracionais en Santiago

A alcaldesa compostelá destaca unha campaña innovadora baseada no xogo e na educación para todas as idades

Publicado o

Por David M. Sobrino Platas

A alcaldesa de Santiago de Compostela, Goretti Sanmartín, presentou este luns a programación de actividades para o 8 de marzo, Día Internacional da Muller, cunha proposta centrada en combinar a celebración e a reivindicación dos dereitos das mulleres. O programa inclúe unha campaña innovadora baseada na gamificación, coa edición dunha revista de pasatempos destinada a todas as xeracións.

“O obxectivo é que este 8 de marzo sexa un referente para empoderar o conxunto das mulleres da sociedade compostelá, combinando a alegría coa defensa dos nosos dereitos”, sinalou Sanmartín. A proposta inclúe unha revista de pasatempos con encrucillados, xeroglíficos e actividades creativas, co propósito de educar e sensibilizar sobre o feminismo dun xeito lúdico e accesible.

A revista, da que se distribuirán 15.000 exemplares, estará dispoñible en comercios, centros educativos, bibliotecas e centros socioculturais, ademais de publicarse en formato dixital. A campaña tamén inclúe 800 carteis, 10 mupis e a presenza en autobuses urbanos, coa finalidade de chegar ao maior número de persoas posible.

A programación inclúe accións destinadas a todas as idades, desde as máis pequenas ata as persoas maiores. “Queremos que netas e aboas poidan compartir esta revista, falar das mulleres referentes, aprender e divertirse ao mesmo tempo”, explicou a alcaldesa.

Un dos eventos principais será o venres 7 de marzo, cun acto na Sala Mozart do Auditorio de Galicia, onde se homenaxeará a oito mulleres destacadas de Compostela. Entre elas, Esperanza Noveira, polo seu traballo no asociacionismo veciñal; Guadi Galego, no ámbito musical; e Melania Cruz, nas artes dramáticas.

O sábado 8 de marzo, o Concello abrirá simbolicamente as súas portas cun acto institucional no Salón Nobre, onde se realizará a lectura da declaración institucional aprobada pola corporación compostelá e se entregará o Premio Xoana Torres, que recoñece traballos de investigación e creación audiovisual sobre a perspectiva de xénero.

MENSAXE ANTE A POLÉMICA COA CIG

Durante a rolda de prensa, Sanmartín tamén respondeu ás preguntas sobre a polémica polo cartel da CIG que foi cualificado de machista polo PP de Santiago. A alcaldesa referiuse ás declaracións previas do BNG, subliñando que “a crítica a calquera muller que ocupe un cargo público debe basearse unicamente nas súas actuacións políticas e nunca noutros aspectos”. Reiterou que o feminismo debe defenderse con coherencia, e asegurou que o seu goberno seguirá traballando por unha Compostela feminista e igualitaria.

A programación do 8M en Santiago pecharase o 28 de marzo coa proxección do documental “Altas Luces”, unha homenaxe ás mulleres do mundo da fotografía, na Sala Mozart do Auditorio de Galicia.

ÚLTIMAS

Buscan ao sospeitoso de provocar un incendio este martes á beira do cemiterio de Boisaca

A Policía Local de Santiago de Compostela busca ao sospeitoso de orixinar un incendio xunto ao...

O CHUS defende o aumento de ambulancias ante as queixas

O complexo hospitalario universitario de Santiago de Compostela (CHUS) defendeu o aumento de ambulancias...

A onda de calor actual “non supera a marca rexistrada” en Santiago de 40º en 1990

O coordinador científico do Observatorio Astronómico Ramón María Aller da Universidade de Santiago de...

Denunciados dous taxistas en Santiago por conducir baixo os efectos do alcol mentres levaban a pasaxeiros

A Garda Civil, a través do Subsector de Tráfico da Coruña, denunciou a dous...

O Concello de Santiago rexeita as “escusas” para non declarar a cidade zona tensionada

A concelleira de Capital Cultural, Turismo, Educación e Memoria Histórica de Santiago de Compostela,...

As concelleiras non adscritas de Santiago esixen aclaracións sobre o freo á zona tensionada

As concelleiras non adscritas de Santiago de Compostela pediron "explicacións detalladas" do proceso polo...

O PP reclama a limpeza da fonte e lavadoiro de Aradas e acusa o goberno local de desleixo no rural

A concelleira do Partido Popular en Santiago de Compostela, Yolanda Otero, reclamou este mércores...

LEAVE A REPLY

Please enter your comment!
Please enter your name here