Olaya Otero denuncia inundacións, falta de limpeza e abandono nos terreos do Combarro tras as chuvias recentes

A concelleira do Partido Popular de Santiago, Olaya Otero, denunciou este luns a situación de abandono que sofre a zona do Combarro, no barrio do Castiñeiriño, tras as chuvias dos últimos días. Segundo explicou, os veciños trasladaron novamente as súas queixas debido á anegación do paso inferior das vías do tren, que conecta o Casal co Combarro, e que quedou completamente intransitable.

Otero destacou que as inundacións neste paso son un problema frecuente, que impide a conexión entre ambas zonas e obriga os veciños a recorrer a outros itinerarios. Ademais, sinalou que o estado das fincas anexas aos terreos de ADIF, afectadas polas obras realizadas pola entidade, segue sendo impracticable.

“Dende o Partido Popular, reclamamos a reposición inmediata destes terreos ao seu estado anterior, tal como se comprometeu ADIF”, subliñou Otero, quen considera que o BNG, á fronte do goberno municipal, debe esixir accións inmediatas para solucionar esta problemática.

Outro dos puntos destacados pola concelleira foi o estado das rúas e gabias do barrio, onde se acumulan maleza, follas e residuos, dificultando a evacuación da auga e favorecendo a proliferación de insectos. “Advertimos xa en decembro de 2024 sobre a necesidade dunha limpeza urxente, pero a situación segue igual”, explicou.

A popular lamentou que a veciñanza se sinta “abandonada e impotente” ante a falta de resposta do goberno municipal liderado polo BNG. “As queixas trasladadas polos residentes quedan sen contestación, e o silencio administrativo parece ser a única resposta”, engadiu.

Para Otero, a actitude do executivo local é unha mostra de “desidia e pasividade”. Reclamou que o BNG escoite as demandas da cidadanía e adopte medidas para mellorar as condicións do barrio do Castiñeiriño.

“É imprescindible que o goberno local entenda que a súa prioridade debe ser ofrecer solucións reais e efectivas aos problemas da cidade”, concluíu.