O grupo municipal do PSOE de Santiago deu a coñecer este sábado as súas demandas para a capital galega no marco das negociacións para os orzamentos de 2025 do Concello que dirixe Goretti Sanmartín (BNG). Nun comunicado, o portavoz socialista no Consistorio, Gonzalo Muíños, defendeu a necesidade de chegar a acordos. “Temos claro que, en tempos de rifa política e crispación, chegar a acordos nos que a cidadanía e o noso municipio sexa o máis importante é o responsable, o útil e o noso traballo como representantes cidadáns”, incidiu.
Fíxoo tras remarcar que a negociación das contas no Consistorio parece “encarar a súa fase final”, dado que a comisión negociadora dos socialistas intercambiou co goberno local as últimas propostas. Entre outras cuestións, os socialistas queren impulsar a licitación do novo complexo deportivo de Santa Marta que “daría servizo á zona sur de Santiago” e para o que, afirman, “deixaron xa un anteproxecto e un estudo económico realizado no pasado mandato”.
Tamén propoñen a renovación doutros equipamentos –como parques infantís–, a tramitación de zona de mercado residencial tensionado nos próximos meses, así como a constitución da nova Emuvissa. Igualmente, reclaman que se realicen dúas convocatorias dos ‘Bonos Corazón’ (do comercio) –-unha na primavera e outra no outono cun fondo de 300.000 euros cada unha– e o impulso das reurbanizacións comprometidas na Rúa García Lorca (Vite) e na Rúa Mallou.
