A alcaldesa de Santiago, Goretti Sanmartín, lamentou este xoves que a taxa turística, que será de voluntaria aplicación por parte dos concellos, finalmente non sexa un imposto senón unha “recarga municipal”. Así o asegurou ante as preguntas dos medios, ademais incidiu en que “non parece moi lóxico” que haxa unha serie de “condicionantes de utilización”, aínda que estes sexan “moi amplos”.
“Aínda que o que están a facer agora os servizos técnicos é estudala, aínda non empezamos a implementación porque entendemos que hai posibilidade de modificar esa proposta como se nos dixo”, reivindicou. Nesta liña, subliñou que “haberá algunha modificación” porque hai unha serie de cuestións que xa “suscitaron dúbidas”. En todo caso, destacou que o Concello asumirá o que lle corresponde, “aínda que hai quen o poña en cuestión”. “Dado que a Xunta non quere facer a súa xestión de recadación directamente a través de Atriga, nós si que o imos a facer, aínda que entendemos que non é a mellor solución”, defendeu.
TAXA A EXCURSIONISTAS
Por outra banda, Sanmartín tamén aproveitou as preguntas dos medios para reivindicar a necesidade de avanzar nunha taxa para os excursionistas que visitan Compostela. Neste sentido, asegurou que é algo “no que se vai avanzar” coa idea de poder desenvolvela ao longo do ano que vén, porque a cidadanía opina que estes visitantes “deixan menos retorno na cidade”, xa que son visitas sen pasar a noite.
