Este mediodía, o reitor da Universidade de Santiago Antonio López enviaba un comunicado a toda a comunidade universitaria informando da ocupación dun grupo de 20 persoas, identificadas como integrantes do Espazo aberto internacionalista do estudantado e da clase traballadora de Compostela e que, segundo indica, impediron pola forza o acceso do xerente ao seu lugar de traballo.
Como medida cautelar, López anunciou que a USC pechará o acceso ao público dos edificios de San Xerome e da Casa da Balconada. O acceso a traballadores e traballadoras que presten servizos neses edificios deberá realizarse coa tarxeta de identificación universitaria nas portas habilitadas para estes efectos”, indicaba o comunicado. Ademais, as persoas que non teñan vinculación coa universidade deberán solicitar cita previa de forma telefónica ou a través de correo electrónico nos servizos aos que necesiten dirixirse de forma presencial.
Na entrada do edificio, os membros da asemblea colocaron un posto de comida gratis por Palestina, no que ofrecen galletas e froita, e repartiron folletos sobre as demandas da asemblea á USC. “O noso obxectivo, lonxe de ser alcanzado na ocupación da rectoría a pasada semana e ante a inacción dos órganos democráticos da USC, continúa sendo o mesmo: deter a vergoñosa colaboración da universidade co xenocidio perpetrado por Israel”, apuntou nun comunicado.
Polo momento, explicou un dos portavoces da asemblea a Europa Press, quedarán no edificio “todo o día” e convocaron, ás 20,30 horas desta xornada, unha concentración.
