A acampada pro Palestina que desde hai case un mes permanece na Facultade de Xeografía e Historia de Santiago volveu a acusar á directiva da USC de manter a súa condena ao “xenocidio” do pobo palestino por parte do Estado de Israel no plano “simbólico” e non dar pasos cara á ruptura de relacións con entidades e empresas que apoian “o sionismo”.
A asemblea da acampada celebrou na mañá deste venres unha nova rolda de prensa na entrada da facultade compostelá para trasladar o resultado da reunión mantida o pasado mércores co equipo directivo da USC, á que finalmente non acudiu o reitor, Antonio López.
Os estudantes lamentaron a ausencia do reitor, representado no encontro polo xerente da institución académica, Javier Ferreira, a vicerreitora de Estudantes e Cultura, Pilar Murias, e o seu xefe de gabinete, Carlos Toural.
Acusan ao primeiro de manter un “ton paternalista e misóxino” con intentos por “hexemonizar o discurso” durante a reunión, á que os acampados acudiron para “esixir” a asunción por parte da USC dun documento con 17 medidas encamiñadas a “romper” coa súa relación con entidades que respaladan “o estado sionista” e a manifestar un compromiso “real” coa causa do pobo palestino.
Critican a negativa a cumprir esta demanda e tamén a impedir a súa asistencia ao consello de goberno da USC deste luns “baixo o argumento de que só aceptarían como interlocutores válidos a persoas que o equipo directivo considere técnicas especializadas na cuestión palestina”.
Para a asemblea de estudantes, o “obxectivo desta táctica discursiva é desestimar calquera medida que transcenda do simbólico e supoña unha desvinculación real das entidades sionistas” por parte da USC, á que acusan de manter un compromiso “retórico” coa causa palestina, como, ao seu xuízo, evidencia a negativa a exhibir nas facultades “simboloxía palestina”.
Sobre esta reclamación plasmada no documento de 17 medidas defendidas pola asemblea, afirman que a directiva da USC trasladoulles que facelo sería converter os espazos da universidade en “unha ensalada de bandeiras” e “situaría ideológicamente” á institución, algo que consideran que “xa fai” con “a súa colaboración” con entidades israelís.
Saúdan a reunión prevista para este venres do equipo reitor coa Asociación Galaico-Árabe Jenin e avisan que “non” cederán na loita “ata que a USC asuma todas” as súas reivindicacións, que teñen “un obxectivo claro: esixir a liberdade do pobo palestino desde o río ata o mar”.
“PERSECUCIÓN POLICIAL”
Ademais, os acampados tamén denuncian que as forzas da orde están a someter a unha “persecución policial” ás que persoas que participan no peche de Historia, con “fotografías” e “seguimentos” fóra do espazo onde leva a cabo a protesta.
Como exemplo disto, sinalaron a identificación dunha persoa por levar unha kufiya e a outro cinco persoas que recollían firmas á beira dunha tenda de campaña “alegando que podía danar o patrimonio” ou a “acusación” a outro membro da acampada de “portar armas” por “levar ao pescozo un colar de petiscos”.
Consideran que estas accións da Policía Local e Nacional, sumadas a “a campaña de difamación” da que responsabilizan á directiva da USC e aos medios de comunicación, pretende “amedrentar” e “dividir” á acampada.
